کراچی کے علاقے منگھوپیر میں نہر کے قریب پولیس اور ڈاکوؤں کے درمیان فائرنگ کے تبادلے میں ایک پولیس اہلکار شہید جبکہ دوسرا زخمی ہو گیا۔
تفصیلات کے مطابق پولیس اہلکاروں نے موٹر سائیکل سوار مشکوک افراد کو روکنے کی کوشش کی، جس پر ملزمان نے فائرنگ شروع کر دی۔ فائرنگ کے نتیجے میں اہلکار خادم شہید جبکہ اہلکار طفیل زخمی ہو گیا۔ ملزمان موقع سے فرار ہونے میں کامیاب ہو گئے۔
پولیس حکام کے مطابق جائے وقوعہ سے تیس بور اور نائن ایم ایم پستول کے خول ملے ہیں، جبکہ فرار ملزمان کی گرفتاری کے لیے علاقے میں سرچ آپریشن جاری ہے۔
ایس ایس پی ویسٹ طارق الٰہی کا کہنا ہے کہ زخمی اہلکار کا بیان ریکارڈ کر لیا گیا ہے اور واقعے کی مکمل تفتیش جاری ہے تاکہ ملزمان کو جلد گرفتار کیا جا سکے۔
واقعے کا نوٹس لیتے ہوئے وزیر داخلہ سندھ ضیا الحسن لنجار نے فوری کارروائی کی ہدایت دیتے ہوئے کہا ہے کہ پولیس اہلکار کی شہادت میں ملوث ملزمان کو جلد از جلد قانون کے کٹہرے میں لایا جائے۔
انہوں نے مزید ہدایت کی کہ ملزمان کی گرفتاری کے لیے خصوصی ٹیم تشکیل دی جائے اور جامع تفتیش کے ذریعے اس کیس کو منطقی انجام تک پہنچایا جائے۔
منگھوپیر مقابلہ، پولیس اہلکار شہید
