باغی ٹی وی :میرپور خاص سے دل دہلا دینے والا واقعہ سامنے آیا ہے، جہاں غیرت کے نام پر سفاکیت کی انتہا کر دی گئی۔ ایک شخص نے اپنی 7 ماہ کی حاملہ بیوی اور دو معصوم بچوں (5 اور 8 سال) کو ہاتھ پیر باندھ کر زندہ جلا دیا۔ اس وحشیانہ عمل نے انسانیت کو شرمسار کر کے رکھ دیا ہے۔
پولیس کے مطابق ملزم ویجھو بھیل نے اپنے تین بھائیوں کے ساتھ مل کر اس گھناؤنے جرم کا ارتکاب کیا۔ واقعہ میرپور خاص کے ایک علاقے میں پیش آیا اور پولیس نے چاروں ملزمان کو گرفتار کر لیا ہے۔ گرفتار شوہر نے تفتیش کے دوران "غیرت” کے نام پر قتل کا اعتراف کرتے ہوئے کہا کہ اسے شک تھا جو اسے اس قدم تک لے گیا۔
میڈیکو لیگل افسر کی رپورٹ نے واقعے کی ہولناکی کو مزید بے نقاب کیا۔ خاتون اور بچوں کے ہاتھ پیر رسیوں سے بندھے ہوئے تھے جب انہیں آگ کے حوالے کیا گیا۔ جسموں پر تشدد کے گہرے نشانات بھی ملے، جو اس بات کی گواہی دیتے ہیں کہ موت سے پہلے انہیں شدید اذیت دی گئی۔
پولیس نے خاتون کے بھائی کی درخواست پر قتل کا مقدمہ درج کر لیا ہے اور تفتیش شروع کر دی ہے۔