پنجاب میں نجی اسکولوں کے طلبہ کو بھی سرکاری اسکولوں کی طرز پر لیپ ٹاپ اسکیم اور سستا انٹرنیٹ فراہم کرنے کی تجویز سامنے آ گئی ہے۔
یہ تجویز وزیرِ قانون پنجاب رانا محمد اقبال سے پرائیویٹ اسکولز مینجمنٹ ایسوسی ایشن کے ایک اعلیٰ سطحی وفد کی ملاقات کے دوران پیش کی گئی۔ ملاقات میں نجی تعلیمی اداروں کو درپیش مالی و انتظامی مسائل اور تعلیمی معیار کو بہتر بنانے کے لیے مختلف امور پر تفصیلی گفتگو ہوئی۔
وفد کی قیادت ایسوسی ایشن کے مرکزی صدر کاشف ادیب کر رہے تھے، جنہوں نے حکومت کے سامنے متعدد مطالبات رکھے۔ وفد نے مؤقف اختیار کیا کہ کم فیس لینے والے نجی اسکولوں کے لیے کمرشلائزیشن فیس ختم کی جائے اور بجلی کے کمرشل ٹیرف کی جگہ تعلیمی ٹیرف نافذ کیا جائے تاکہ اخراجات کم ہو سکیں۔
ملاقات میں تعلیمی معیار کی بہتری کے لیے سالانہ 220 تدریسی دن مقرر کرنے کی سفارش بھی کی گئی، جبکہ نجی اسکولوں کے اساتذہ کے لیے خصوصی سہولتیں اور آسان قرضہ اسکیمیں متعارف کرانے کا مطالبہ بھی سامنے آیا۔
وفد نے اس بات پر زور دیا کہ نجی اسکولوں کے طلبہ کو بھی سرکاری اسکولوں کی طرح جدید سہولیات فراہم کی جائیں، جن میں لیپ ٹاپ اسکیم اور سستے انٹرنیٹ کی فراہمی شامل ہے، تاکہ طلبہ کو یکساں تعلیمی مواقع میسر آ سکیں۔
وزیرِ قانون پنجاب رانا محمد اقبال نے وفد کے مطالبات غور سے سنے اور یقین دہانی کرائی کہ حکومت ان مسائل کو ترجیحی بنیادوں پر حل کرے گی۔ انہوں نے کہا کہ پنجاب حکومت تعلیم کے فروغ کے لیے اقدامات کر رہی ہے اور نجی شعبے کے مسائل کو بھی نظر انداز نہیں کیا جائے گا۔
انہوں نے متعلقہ حکام کو ہدایت دی کہ تمام تجاویز کا جائزہ لے کر رپورٹ پیش کی جائے تاکہ ضروری قانونی اور انتظامی اقدامات کیے جا سکیں۔
نجی طلبہ کیلئے لیپ ٹاپ اور سستا انٹرنیٹ دینے کی تجویز
