لاہور: وزیر تعلیم پنجاب رانا سکندر حیات نے واضح کیا ہے کہ صوبے بھر کے تمام تعلیمی ادارے یکم اپریل سے معمول کے مطابق کھول دیے جائیں گے، جبکہ سوشل میڈیا پر زیر گردش تدریسی عمل سے متعلق نوٹیفکیشن کو جعلی قرار دے دیا گیا ہے۔
وزیر تعلیم کے مطابق تعلیمی ادارے ہفتے میں پانچ دن کھلے رہیں گے اور تمام کلاسز روایتی یعنی فزیکل انداز میں ہوں گی۔ انہوں نے کہا کہ ہائبرڈ نظام یا آن لائن کلاسز متعارف کرانے کا کوئی فیصلہ نہیں کیا گیا، طلبہ کو باقاعدگی سے اسکول آ کر تعلیم حاصل کرنا ہوگی۔رانا سکندر حیات نے مزید کہا کہ تعلیمی اداروں کو ہفتے میں چار دن کھولنے سے متعلق سوشل میڈیا پر گردش کرنے والا نوٹیفکیشن بھی بے بنیاد اور جعلی ہے۔ انہوں نے والدین اور طلبہ کو ہدایت کی کہ وہ غیر مصدقہ خبروں پر کان نہ دھریں اور صرف سرکاری اعلانات پر اعتماد کریں۔انہوں نے اس عزم کا اظہار کیا کہ حکومت پنجاب تعلیمی نظام کی بہتری اور طلبہ کے تعلیمی نقصان کے ازالے کے لیے سنجیدہ اقدامات جاری رکھے گی۔