ریاستِ قطر کی وزارتِ خارجہ نے پاکستان کے صوبہ خیبر پختونخوا اور پنجاب میں ہونے والے دہشت گرد حملوں کی شدید الفاظ میں مذمت کرتے ہوئے قیمتی انسانی جانوں کے ضیاع اور متعدد افراد کے زخمی ہونے پر گہرے دکھ اور افسوس کا اظہار کیا ہے۔
قطری وزارتِ خارجہ کی جانب سے جاری بیان میں کہا گیا ہے کہ ریاستِ قطر ہر قسم کے تشدد، دہشت گردی اور مجرمانہ کارروائیوں کو مسترد کرتی ہے، چاہے ان کے محرکات یا جواز کچھ بھی ہوں۔ بیان میں اس عزم کا اعادہ کیا گیا کہ قطر عالمی امن و استحکام کے فروغ اور دہشت گردی کے خاتمے کے لیے اپنی اصولی پالیسی پر قائم ہے۔
زارتِ خارجہ نے متاثرہ خاندانوں سے دلی تعزیت اور ہمدردی کا اظہار کرتے ہوئے حکومتِ پاکستان اور پاکستانی عوام کے ساتھ مکمل یکجہتی کا اعلان کیا۔ ساتھ ہی زخمیوں کی جلد صحت یابی کے لیے نیک تمناؤں کا بھی اظہار کیا گیا۔قطری حکام کے مطابق دہشت گردی کے ایسے واقعات خطے کے امن و استحکام کے لیے خطرہ ہیں اور عالمی برادری کو مل کر اس ناسور کے خلاف مؤثر اقدامات کرنے ہوں گے۔