اسلام آباد: قومی اسمبلی کا اجلاس اگلے ہفتے بلانے کا فیصلہ کرلیا گیا ہے، جس کے لیے وزارتِ پارلیمانی امور نے باقاعدہ سمری وزیراعظم کو ارسال کردی ہے۔ ذرائع کے مطابق وزیراعظم کی منظوری کے بعد قومی اسمبلی سیکریٹریٹ اجلاس بلانے کا نوٹیفکیشن جاری کرے گا۔
رپورٹ کے مطابق آئندہ اجلاس میں اہم قانون سازی کے ساتھ ساتھ عوامی اور قومی نوعیت کے متعدد اہم مسائل پر تفصیلی بحث متوقع ہے۔ حکومتی ذرائع کا کہنا ہے کہ اجلاس کے دوران زیر التوا اور نئے قانون سازی کے ایجنڈے پر غور کیا جائے گا، جب کہ مختلف وزارتوں کی کارکردگی اور عوام کو درپیش مسائل بھی ایوان میں زیر بحث آئیں گے۔ذرائع کے مطابق قومی اسمبلی کے اجلاس میں اپوزیشن لیڈر کی تقرری کے عمل کا باقاعدہ آغاز بھی متوقع ہے، جس کے لیے اپوزیشن جماعتوں سے مشاورت کا مرحلہ شروع کیا جائے گا۔ پارلیمانی حلقوں کا کہنا ہے کہ اپوزیشن لیڈر کی تقرری سے پارلیمانی امور میں توازن اور قانون سازی کے عمل میں بہتری آنے کی امید ہے۔
مزید برآں رپورٹ میں بتایا گیا ہے کہ اسلام آباد بلدیاتی انتخابات سے متعلق بل بھی قومی اسمبلی میں پیش کیے جانے کا امکان ہے، جس پر ایوان میں تفصیلی بحث کے بعد منظوری یا ترامیم کی جا سکتی ہیں۔ اس بل کو دارالحکومت میں بلدیاتی نظام کے تسلسل اور جمہوری عمل کے فروغ کے لیے اہم قرار دیا جا رہا ہے۔پارلیمانی ذرائع کے مطابق توقع ہے کہ قومی اسمبلی کا یہ اجلاس تقریباً دو ہفتے تک جاری رہے گا، جس کے دوران سوالات، توجہ دلاؤ نوٹس، تحاریک اور قراردادیں بھی ایوان میں پیش کی جائیں گی۔ حکومتی و اپوزیشن اراکین کی جانب سے مہنگائی، معیشت، امن و امان اور دیگر اہم قومی معاملات پر اظہارِ خیال کیے جانے کا امکان ہے۔