قائداعظم یونیورسٹی کے گرلز ہاسٹل میں دیوار پھلانگ کر نوجوان پہنچ گیا ،گرفتار

اسلام آباد کی قائداعظم یونیورسٹی میں سکیورٹی کے ناقص انتظامات ایک بار پھر سوالیہ نشان بن گئے ہیں، جہاں گرلز ہاسٹل میں غیر متعلقہ نوجوان کے داخل ہونے کا افسوسناک واقعہ پیش آیا۔

واقعے کی ویڈیو بھی سامنے آ گئی ہے جس کے بعد طالبات میں شدید خوف و ہراس پھیل گیا ہے۔نامعلوم نوجوان گزشتہ رات تقریباً 2 بجے سکیورٹی کی سنگین خلاف ورزی کرتے ہوئے گرلز ہاسٹل میں داخل ہوا۔ ابتدائی معلومات کے مطابق نوجوان دیوار پھلانگ کر ہاسٹل نمبر 5 کے احاطے میں داخل ہوا، جہاں بعد ازاں اسے ہاسٹل کے واش روم میں دیکھا گیا۔ واقعے کی اطلاع ملتے ہی طالبات میں تشویش کی لہر دوڑ گئی اور شور شرابا شروع ہو گیا۔

سوشل میڈیا پر وائرل ہونے والی ویڈیو میں مذکورہ نوجوان خود کو راول ڈیم کا رہائشی ظاہر کرتا ہے اور یہ بھی کہتا دکھائی دیتا ہے کہ وہ پہلی مرتبہ ہاسٹل آیا ہے۔ ویڈیو میں نوجوان کا غیر سنجیدہ رویہ بھی نمایاں ہے، جس نے طالبات کے خدشات میں مزید اضافہ کر دیا۔واقعے کے بعد گرلز ہاسٹل میں خوف و ہراس کی فضا قائم ہو گئی، جبکہ طالبات نے یونیورسٹی انتظامیہ کی جانب سے بروقت اور مؤثر کارروائی نہ ہونے پر شدید تحفظات کا اظہار کیا ہے۔ طالبات کا کہنا ہے کہ ایک گھنٹے سے زائد وقت تک نوجوان ہاسٹل میں موجود رہا، اس دوران اس نے کیا سرگرمیاں انجام دیں، اس حوالے سے انتظامیہ کو واضح جواب دینا چاہیے۔ طالبات کے مطابق نوجوان کو واش روم میں گانے گاتے ہوئے بھی دیکھا گیا، جو صورتحال کی سنگینی کو مزید بڑھاتا ہے۔

دوسری جانب پولیس کا کہنا ہے کہ اطلاع ملنے پر کارروائی کی گئی۔ پولیس کے مطابق گزشتہ رات گرلز ہاسٹل نمبر 5 میں نوجوان دیوار پھلانگ کر داخل ہوا تھا، تاہم طالبات کے شور مچانے پر لیڈی وارڈن اور سکیورٹی اسٹاف نے فوری کارروائی کرتے ہوئے مذکورہ لڑکے کو قابو میں لے لیا۔طالبات کا کہنا تھا کہ اس نوجوان کا شناختی کارڈ چیک کیا جانا چاہئے یہ کتنے وقت سے آ رہا ہے تحقیقات کی جانی چاہئے، طالبات کو تحفظ فراہم کیاجائے،