پاکستان ریلوے اور یو اے ای کے درمیان دوطرفہ تعاون کو بڑھانے کے لیے وزیر ریلوے محمد حنیف عباسی نے آج اسلام آباد میں یو اے ای کے سفیر ایچ ای حماد عبید الزاب کے ساتھ ایک اہم ملاقات کی۔ اس ملاقات میں پاکستان ریلوے اور یو اے ای کے درمیان مال برداری کے شعبے میں تعاون کو فروغ دینے کے امکانات پر بات چیت کی گئی۔ملاقات کے دوران یو اے ای نے کراچی گیٹ وے ٹرمینل، جو ایڈ پورٹس گروپ کی ذیلی کمپنی کے زیر ملکیت ہے، اور پاکستان ریلوے کے درمیان مال بردار ٹرین سروسز کے آغاز کے لیے طویل المدتی معاہدے کی پیشکش کی۔ اس شراکت داری سے پاکستان ریلوے کے مال برداری کے شعبے میں مارکیٹ شیئر میں اضافہ ہوگا اور ملک کی ملٹی موڈل ٹرانسپورٹ کی صلاحیتوں میں مزید بہتری آئے گی۔
یو اے ای نے پاکستان ریلوے کی مال برداری خدمات کو جدید بنانے کے لیے طویل المدتی تعاون کی پیشکش کی ہے، جس سے نہ صرف پاکستان ریلوے کی صلاحیتوں میں اضافہ ہوگا بلکہ دونوں ممالک کے درمیان تجارتی روابط بھی مزید مستحکم ہوں گے۔اس معاہدے پر بات چیت کے لیے دونوں فریقوں نے مشترکہ فریم ورک تیار کرنے پر اتفاق کیا ہے، جس کے تحت آگے کی کارروائی کی جائے گی۔ اس شراکت داری سے پاکستان ریلوے کی خدمات کی کارکردگی اور ہم آہنگی میں بہتری آئے گی، جس کا فائدہ نہ صرف پاکستان بلکہ پورے خطے کے لیے ہوگا۔