کراچی: وزیر داخلہ سندھ ضیا لنجار نے سٹی کورٹ کراچی میں یوٹیوبر رجب بٹ پر تشدد کے واقعے پر گہری تشویش اور افسوس کا اظہار کیا ہے۔
کراچی میں پریس کانفرنس کرتے ہوئے ضیا لنجار نے کہا کہ رجب بٹ پر تشدد کے معاملے پر انہوں نے چیف جسٹس سے بھی بات کی ہے۔ انہوں نے واضح کیا کہ عدالت میں جو کچھ ہوا، وہ وکیلوں کے لیے قابل قبول رویہ نہیں ہے۔ ضیا لنجار کے مطابق عدالت میں موجود کورٹ پولیس کی ذمہ داری ملزمان کو پیش کرنے اور واپس لے جانے تک محدود ہوتی ہے۔وزیر داخلہ نے مزید کہا یوٹیوبر رجب بٹ پر حملہ ایک افسوسناک واقعہ ہے۔ عدالت میں پیش آنے والے اس طرح کے تشدد کے واقعات قانونی نظام کی ساکھ پر بھی سوالیہ نشان لگاتے ہیں۔
واضح رہے کہ آج صبح عدالت میں آمد کے موقع پر وکلاء نے رجب بٹ پر تشدد کیا، جس کے دوران یوٹیوبر کو جسمانی نقصان پہنچا۔اس سلسلے میں وکلاء رہنماؤں کا موقف تھا کہ رجب بٹ نے عبوری ضمانت حاصل کرنے کے بعد ایک وی لاگ بنایا تھا، جس میں انہوں نے مدعی مقدمہ کے حوالے سے بعض نامناسب الفاظ استعمال کیے تھے۔ تاہم، اس کے باوجود عدالت میں تشدد کے واقعے کو قانونی اور پیشہ ورانہ نقطہ نظر سے نا قابل قبول قرار دیا گیا ہے۔