بالی وڈ کی متنازع اداکارہ راکھی ساونت نے لیجنڈری اداکار امیتابھ بچن کو اداکارہ ریکھا کے ساتھ دوسری شادی کا مشورہ دے دیا، جس پر سوشل میڈیا پر نئی بحث چھڑ گئی ہے۔
راکھی ساونت کی بھارتی میڈیا سے گفتگو کا ایک ویڈیو کلپ سوشل میڈیا پر وائرل ہو رہا ہے، جس میں وہ امیتابھ بچن اور جیا بچن کی ازدواجی زندگی پر تبصرہ کرتی دکھائی دے رہی ہیں۔
ویڈیو میں راکھی ساونت کا کہنا ہے کہ وہ امیتابھ بچن کو مشورہ دیں گی کہ وہ سینئر اداکارہ ریکھا سے شادی کر لیں، کیونکہ آج کل دو شادیوں کا رجحان عام ہو چکا ہے۔ انہوں نے سوال اٹھایا کہ امیتابھ بچن نے جیا بچن کو کیوں منتخب کیا اور ریکھا کو کیوں نظر انداز کیا، یہ بات انہیں آج تک سمجھ نہیں آئی۔
راکھی ساونت نے جیا بچن کے طرزِ لباس پر بھی تنقید کرتے ہوئے کہا کہ وہ کروڑوں اور اربوں کی مالکن ہونے کے باوجود اچھی شلوار قمیض تک نہیں پہنتیں۔ اس موقع پر راکھی نے طنزیہ انداز میں جیا بچن کو مخاطب کرتے ہوئے کہا کہ اگر وہ اپنی سالگرہ پر انہیں مدعو کریں تو وہ انہیں اچھی شلوار قمیض تحفے میں دیں گی۔
اداکارہ نے جیا بچن کو مزید مشورہ دیتے ہوئے کہا کہ وہ اپنے بالوں کو رنگیں اور چہرے پر بوٹاکس کروائیں، کیونکہ وہ امیتابھ بچن جیسی بڑی شخصیت کی اہلیہ ہیں۔ راکھی ساونت کا کہنا تھا کہ اگر انہیں امیتابھ بچن کے لیے جیا بچن اور ریکھا میں سے کسی ایک کا انتخاب کرنا پڑے تو وہ بلا جھجھک ریکھا کا انتخاب کریں گی۔
راکھی ساونت کے اس بیان پر سوشل میڈیا صارفین کی جانب سے ملا جلا ردعمل سامنے آ رہا ہے، جہاں کچھ لوگ اسے محض توجہ حاصل کرنے کی کوشش قرار دے رہے ہیں جبکہ کچھ اسے نامناسب تبصرہ کہہ رہے ہیں۔
راکھی ساونت کا امیتابھ بچن کو ریکھا سے دوسری شادی کا مشورہ
