محکمہ جنگلات نے خفیہ اطلاع پر کارروائی کرتے ہوئے نایاب پرندوں اور جنگلی جانوروں کی اسمگلنگ ناکام بنا دی۔ کارروائی کے دوران ہنس نسل کی 44 نایاب بطخیں برآمد کر لی گئیں جبکہ دو ملزمان کے خلاف مقدمہ درج کر لیا گیا ہے۔
اے آر وائی نیوز کے مطابق یہ پرندے ’’بار ہیڈڈ گیز‘‘ کہلاتے ہیں جو سائبیریا سے ہجرت کر کے پاکستان آتے ہیں۔ محکمہ جنگلات اور جنگلی حیات کی ٹیم نے بتایا کہ تمام پرندے صحت مند ہیں، جنہیں کل کالا خطائی نیشنل پارک سے آزاد کر دیا جائے گا۔
حکام کے مطابق کارروائی نایاب پرندوں اور پاڑہ ہرن کے گوشت کی اسمگلنگ میں ملوث مافیا کے خلاف کی گئی۔ پنجاب حکومت نے غیر قانونی سرگرمی کی اطلاع دینے والے شہری کو سراہا جبکہ وزیراعلیٰ مریم نواز نے محکمہ جنگلات اور جنگلی حیات کی ٹیم کو کامیاب کارروائی پر شاباش دی۔
نایاب مہاجر پرندوں کی اسمگلنگ ناکام، 44 بطخیں برآمد
