راولپنڈی اور اسلام آباد میں 10 اپریل 2026 کو شام 5 بجے تک کی ٹریفک صورتحال کے مطابق شہر کے داخلی و خارجی راستے عام ٹریفک کیلئے کھلے رکھے گئے ہیں، تاہم ریڈ زون میں سکیورٹی کے باعث اہم شاہراہیں بدستور بند ہیں۔
ٹریفک حکام کے مطابق ریڈ زون میں داخلے کیلئے متعدد راستوں پر رکاوٹیں اور متبادل راستوں کا انتظام کیا گیا ہے۔ اس دوران اسلام آباد ایکسپریس وے کو کورال چوک سے زیرو پوائنٹ تک جبکہ پرانے ائیرپورٹ کے علاقے سے بھی بند رکھا گیا ہے۔اسی طرح زیرو پوائنٹ سے سیرینا ہوٹل جانے والی سڑک کو بھی مکمل طور پر بند کردیا گیا ہے، جس کے باعث شہریوں کو متبادل راستے اختیار کرنے کی ہدایت کی گئی ہے۔حکام کا کہنا ہے کہ موجودہ ٹریفک پلان ممکنہ طور پر 11 اپریل کی شام تک برقرار رہے گا، لہٰذا شہری غیر ضروری سفر سے گریز کریں اور سفر سے قبل ٹریفک اپڈیٹس ضرور چیک کریں۔مزید کسی بھی نئی صورتحال یا تبدیلی سے متعلق شہریوں کو بروقت آگاہ کیا جائے گا۔