سلمان خان اور ایشوریا رائےکے بریک اپ بارے نیا انکشاف

بالی وڈ کے مشہور اداکار سلمان خان اور ایشوریا رائے 90 کی دہائی کے آخر میں سب سے زیادہ پسند کیے جانے والے جوڑوں میں شامل تھے۔ ان کی کیمسٹری فلم "ہم دل دے چکے صنم” میں بہت خوبصورتی سے دکھائی گئی تھی، جس نے ناظرین کو بے حد متاثر کیا۔ تاہم، یہ جوڑی فلم کی کہانی کی طرح حقیقت میں بھی ایک نہ ہو سکی۔

ایشوریا رائے اور سلمان خان کی علیحدگی اتنی سنجیدہ نوعیت کی تھی کہ بعد میں ایشوریا نے سلمان خان کے ساتھ تعلق میں ہونے سے انکار کر دیا تھا۔ اس کے بعد، کئی ایونٹس پر ایشوریا نے سلمان خان کو نظر انداز کیا، جو کہ ان کے مداحوں نے بخوبی محسوس کیا۔حال ہی میں، ایک سینئر فلمی صحافی اور مصنف حنیف زاویری نے سلمان اور ایشوریا کے بریک اپ کے حوالے سے نئی تفصیلات شیئر کی ہیں۔ حنیف زاویری نے ایک پوڈ کاسٹ میں بات کرتے ہوئے کہا کہ سلمان خان اور ایشوریا رائے کا رشتہ بہت سنجیدہ تھا اور دونوں ایک دوسرے سے شادی کرنا چاہتے تھے، لیکن ایشوریا کے والدین سلمان خان کو پسند نہیں کرتے تھے۔

حنیف زاویری نے مزید کہا: "سلمان اور ایشوریا کا پیار سنجیدہ تھا، اور دونوں چاہتے تھے کہ ان کی شادی ہو، لیکن ایشوریا کے والدین سلمان سے خوش نہیں تھے۔ ان کا خیال تھا کہ سلمان کا رشتہ دیگر اداکاراؤں جیسے سومی علی اور سنگیتا بجلانی سے رہا ہے، اور وہ سمجھتے تھے کہ سلمان صرف فلرٹ کر رہا ہے، نہ کہ واقعی شادی کرنا چاہ رہا ہے۔”حنیف زاویری نے یہ بھی بتایا کہ سلمان خان شادی کے بارے میں سنجیدہ تھے اور جلد شادی کرنا چاہتے تھے، لیکن ایشوریا اس وقت شادی کرنے کے لیے تیار نہیں تھیں کیونکہ وہ خود کو ابھی تک سیٹل نہیں کرنا چاہتی تھیں۔ اسی وجہ سے دونوں کے درمیان تلخیاں بڑھ گئیں۔

حنیف زاویری نے یہ بھی ذکر کیا کہ ایک بار سلمان خان نے ایشوریا کی بلڈنگ پر جا کر دروازہ زور سے کھٹکھٹایا اور ایک ڈرامہ رچایا۔ اس کے بعد، پڑوسیوں نے سلمان خان کے بارے میں انٹرویوز دیے، جو کہ اخبار میں شائع ہوئے۔ ایشوریا نے یہ سب کچھ بہت نامناسب سمجھا اور اسی وجہ سے انہوں نے سلمان خان سے اپنا رشتہ ختم کر دیا۔