رکھنی میں عوامی اجتماع سے خطاب کرتے ہوئے وزیراعلیٰ بلوچستان سرفراز بگٹی نے کہا ہے کہ انتظامی یونٹس کی تقسیم اور نئے ڈویژن کے قیام سے عوامی مسائل کے حل میں نمایاں بہتری آئے گی۔ ان کا کہنا تھا کہ بلوچستان کی یکساں ترقی حکومت کا پختہ عزم ہے اور دور دراز علاقوں کو ترقی کے دھارے میں لانا اولین ترجیح ہے۔
وزیراعلیٰ بلوچستان نے کہا کہ ہمارا سر کٹ سکتا ہے لیکن ہم کبھی نہیں جھکیں گے۔ بلوچ عوام کو لاحاصل جنگ کی طرف دھکیلا گیا جبکہ بلوچ نوجوانوں کو پروپیگنڈے کے ذریعے ریاست سے دور کرنے کی کوشش کی جا رہی ہے۔ انہوں نے واضح کیا کہ بلوچستان میں دہشتگردوں کے لیے کوئی جگہ نہیں اور سیکیورٹی فورسز کے ساتھ مکمل تعاون جاری رکھا جائے گا۔
سرفراز بگٹی کا کہنا تھا کہ دہشتگردی کا خاتمہ قومی سلامتی کے لیے ناگزیر ہے۔ امن و امان خراب کرنے والوں سے آہنی ہاتھوں سے نمٹا جائے گا جبکہ دہشتگرد عناصر اور ان کے سہولت کاروں کو بھی قانون کے کٹہرے میں لایا جائے گا۔ انہوں نے زور دیا کہ دہشتگردی کے خلاف قومی یکجہتی ناگزیر ہے اور ریاست کی رٹ ہر صورت قائم کی جائے گی۔
وزیراعلیٰ بلوچستان نے کہا کہ معصوم شہریوں کو نشانہ بنانے والے انسانیت کے دشمن ہیں اور ایسے عناصر کو انجام تک پہنچایا جائے گا۔ ان کا کہنا تھا کہ امن کے قیام سے ہی ترقی ممکن ہے اور پورے بلوچستان میں میرٹ کی پالیسی پر سختی سے عملدرآمد کیا جائے گا۔
نئے ڈویژن اور انتظامی اصلاحات سے عوامی مسائل حل ہوں گے، وزیراعلیٰ بلوچستان
