قابلِ اعتماد خفیہ اطلاعات کی بنیاد پر سیکیورٹی فورسز نے ایک ہی دن میں ملک کے مختلف علاقوں میں انسدادِ دہشت گردی کی متعدد کامیاب کارروائیاں انجام دیں، جن کے نتیجے میں مجموعی طور پر 27 دہشت گرد ہلاک کر دیے گئے۔
سیکیورٹی ذرائع کے مطابق شمالی وزیرستان، کرم، بنوں اور بلوچستان کے مختلف علاقوں میں دہشت گردوں کی موجودگی سے متعلق خفیہ معلومات موصول ہوئیں، جس کے بعد مربوط اور ہدفی آپریشنز کیے گئے۔میر علی، شمالی وزیرستان میں سیکیورٹی فورسز کی کارروائی کے دوران 3 دہشت گرد ہلاک ہوئے۔دوغار، کرم ایجنسی میں مقابلے کے بعد 5 دہشت گردوں کو جہنم واصل کر دیا گیا۔اسپن وام، شمالی وزیرستان میں ایک بڑے آپریشن کے دوران 8 دہشت گرد مارے گئے۔دٹہ خیل، شمالی وزیرستان میں فورسز نے مؤثر کارروائی کرتے ہوئے 4 دہشت گردوں کو ہلاک کیا۔بنوں میں انٹیلی جنس بیسڈ آپریشن کے دوران 2 دہشت گردوں کو ٹھکانے لگا دیا گیا۔زمرن رینجز، ضلع کیچ، بلوچستان میں سیکیورٹی فورسز نے دہشت گردوں کے ٹھکانے پر کارروائی کی، جس میں 5 دہشت گرد مارے گئے۔
سیکیورٹی حکام کے مطابق تمام کارروائیاں انتہائی پیشہ ورانہ انداز میں انجام دی گئیں، جن کا مقصد دہشت گرد نیٹ ورکس کا خاتمہ اور عوام کے جان و مال کا تحفظ یقینی بنانا تھا۔ کارروائیوں کے دوران دہشت گردوں سے اسلحہ، گولہ بارود اور مواصلاتی آلات بھی برآمد کیے گئے۔سیکیورٹی فورسز نے اس عزم کا اعادہ کیا ہے کہ ملک سے دہشت گردی کے مکمل خاتمے تک آپریشنز جاری رہیں گے، جبکہ عوام کے تعاون کو بھی اس جنگ میں کلیدی حیثیت حاصل ہے۔