کراچی میں اس وقت متعدد میگا پروجیکٹس جاری ہیں،شرجیل میمن

سینئر وزیر سندھ صوبائی وزیراطلاعات، ٹرانسپورٹ و ماس ٹرانزٹ، شرجیل انعام میمن نے کہا ہے کہ متعدد چیلنجز کے باوجود ریڈ لائن بی آر ٹی منصوبے کو جاری رکھنا ایک اہم کام تھا۔ حکومت سندھ خود اس پورے پروجیکٹ کی نگرانی کر رہی ہے۔انہوں نے کہا کہ عید سے پہلے اطراف کی سڑکوں پر موجود مسائل ختم کرنے کی ہدایت دی گئی ہے۔کوشش ہے کہ پورا پروجیکٹ، خاص طور پر یونیورسٹی روڈ والے علاقے کو جلد مکمل کیا جائے۔

سینئر وزیر نے کہا کہ کراچی میں اس وقت متعدد میگا پروجیکٹس جاری ہیں۔ شارعِ بھٹو پر دی گئی سہولت مارچ کے آخر یا اپریل کے پہلے ہفتے تک قائد آباد تک مکمل ہو جائے گی اور بعد میں اس کو ایم نائن تک بڑھایا جائے گا۔ یہ ٹریفک کے مسائل کے لیے ایک بڑی سہولت ہوگی۔انہوں نے کہا کہ کچھ لوگ مایوسی پھیلانے یا سیاست کرنے کی کوشش کرتے ہیں، لیکن ٹارگٹ یہی ہے کہ ہر حال میں پروجیکٹس مکمل کیے جائیں تاکہ شہریوں کی زندگی آسان اور معیاری ہو۔ دیگر اضلاع میں بھی ترقیاتی کام تیزی سے جاری ہیں اور حکومت تمام چیلنجز حل کرنے کی کوشش کر رہی ہے۔