راولپنڈی پولیس نے تھانہ مندرہ کے علاقے گوہڑہ میں شادی کی ایک تقریب کے دوران ہوائی فائرنگ کرنے والی دلہن کو گرفتار کرلیا، جبکہ دلہا موقع سے فرار ہونے میں کامیاب ہوگیا۔
پولیس کے مطابق دلہن ثناء شہریار کے پاس اسلحہ کا کوئی لائسنس موجود نہیں تھا۔ واقعہ گزشتہ رات پیش آیا جب دلہن لہنگا پہنے تقریب کے دوران پستول سے فائرنگ کرتی پائی گئیں، جس پر پولیس نے بروقت کارروائی کرتے ہوئے انہیں رنگے ہاتھوں گرفتار کرلیا۔پولیس حکام کا کہنا ہے کہ دلہن کی فائرنگ کی ویڈیو بھی موصول ہوگئی ہے، جس کی بنیاد پر مقدمہ درج کرلیا گیا ہے۔ کارروائی کے دوران دلہن کے قبضے سے پستول اور گولیاں بھی برآمد کرلی گئی ہیں۔
ابتدائی تحقیقات کے مطابق دلہا نے دلہن کو پستول فراہم کیا، جبکہ موقع پر موجود فوٹوگرافر کی ہدایت پر دلہن نے فائرنگ کی۔ پولیس کے مطابق دلہن نے گرفتاری سے بچنے کے لیے فرار ہونے کی کوشش بھی کی، تاہم موقع پر موجود لیڈی کانسٹیبل نے انہیں قابو کرلیا۔ذرائع کے مطابق پولیس کو اس واقعے کی خفیہ اطلاع ایک مخبر کے ذریعے ملی تھی، جس پر فوری ایکشن لیا گیا۔پولیس کا کہنا ہے کہ ملزمہ کو آج عدالت میں پیش کیا جائے گا، جبکہ دلہن کے اہل خانہ نے ان کی ضمانت کے لیے درخواست بھی دائر کردی ہے۔