جیکب آباد میں پولیس کے مبینہ طور پر انسانیت سوز اقدام کا انکشاف سامنے آیا ہے، جہاں تھانہ آر ڈی 52 کے ایس ایچ او سمیت سات پولیس اہلکاروں پر ایک کمسن بچی سے مبینہ زیادتی کا سنگین الزام عائد کیا گیا ہے۔ واقعے نے علاقے میں شدید تشویش اور غم و غصے کی لہر دوڑا دی ہے۔
جیونیوز کے مطابق متاثرہ بچی کی دادی نے الزام عائد کیا ہے کہ تھانہ آر ڈی 52 کے ایس ایچ او، ہیڈ محرر اور دیگر پانچ پولیس اہلکاروں نے اس کی پوتی کو مبینہ طور پر جنسی زیادتی کا نشانہ بنایا۔واقعے کے منظرِ عام پر آنے کے بعد وزیر داخلہ سندھ ضیاء الحسن لنجار نے فوری طور پر واقعے کا نوٹس لے لیا ہے۔ وزیر داخلہ نے ایس ایس پی جیکب آباد سے واقعے کی مکمل تفصیلات طلب کر لی ہیں اور شفاف تحقیقات کی یقین دہانی کروائی ہے۔
پولیس حکام کے مطابق ڈی ایس پی ٹھل کی سربراہی میں ایک تحقیقاتی ٹیم تشکیل دے دی گئی ہے، جو الزامات کا ہر پہلو سے جائزہ لے گی۔ حکام کا کہنا ہے کہ اگر الزامات ثابت ہوئے تو ملوث اہلکاروں کے خلاف قانون کے مطابق سخت کارروائی کی جائے گی۔