امریکی ریاست مسسی سپی کے شہر ویسٹ پوائنٹ میں فائرنگ کے ایک افسوسناک واقعے میں 6 افراد ہلاک ہو گئے۔ امریکی میڈیا کے مطابق پولیس نے بروقت کارروائی کرتے ہوئے فائرنگ میں ملوث مشتبہ شخص کو حراست میں لے لیا ہے۔
پولیس حکام کا کہنا ہے کہ فائرنگ کے یہ واقعات شہر کے تین مختلف مقامات پر پیش آئے، جس کے باعث علاقے میں خوف و ہراس پھیل گیا۔ واقعے کی اطلاع ملتے ہی پولیس کی بھاری نفری موقع پر پہنچ گئی اور علاقے کو گھیرے میں لے کر سرچ آپریشن شروع کیا گیا، جس کے دوران ملزم کو گرفتار کر لیا گیا۔کاؤنٹی شیرف ایڈی اسکاٹ نے واقعے کے بعد سماجی رابطے کی ویب سائٹ فیس بک پر جاری بیان میں کہا کہ“بدقسمتی سے آج رات ہماری کمیونٹی کو ایک بڑے المیے کا سامنا کرنا پڑا، تاہم اب صورتحال قابو میں ہے اور عوام کو مزید کسی خطرے کا سامنا نہیں ہے۔”
پولیس کے مطابق فائرنگ کے محرکات اور واقعات کے پس منظر سے متعلق تحقیقات جاری ہیں، جبکہ جائے وقوعہ سے شواہد اکٹھے کر لیے گئے ہیں۔ حکام نے تاحال نہ تو فائرنگ کے اسباب واضح کیے ہیں اور نہ ہی ہلاک ہونے والے افراد کی شناخت جاری کی گئی ہے۔