پاکستان کی شوبز انڈسٹری کے سینئر اداکار شجاعت ہاشمی انتقال کر گئے۔
خاندانی ذرائع کے مطابق مرحوم کی نماز جنازہ آج رات 9 بجے جامع نعیمیہ گڑھی شاہو میں ادا کی جائے گی، جہاں اہل خانہ، عزیز و اقارب، شوبز شخصیات اور مداحوں کی بڑی تعداد کی شرکت متوقع ہے۔شجاعت ہاشمی پاکستان ٹیلی ویژن اور فلم انڈسٹری کا ایک معتبر نام تھے۔ انہوں نے کئی دہائیوں تک اداکاری اور صداکاری کے میدان میں نمایاں خدمات انجام دیں اور اپنے منفرد اندازِ اداکاری کی بدولت شائقین کے دلوں میں خاص مقام بنایا۔
وہ خصوصاً کلاسک ٹی وی ڈرامہ وارث میں اپنے یادگار کردار کے باعث بے حد مقبول ہوئے۔ اس ڈرامے کو پاکستان ٹیلی ویژن کی تاریخ کے کامیاب ترین اور بااثر ڈراموں میں شمار کیا جاتا ہے۔ اس کے علاوہ انہوں نے 1979 میں ریلیز ہونے والی فلم خاک اور خون میں بھی اہم کردار ادا کیا جسے ناظرین نے بے حد سراہا۔فن اور ثقافت کے میدان میں ان کی گراں قدر خدمات کے اعتراف میں حکومت پاکستان نے انہیں 1994 میں پرائیڈ آف پرفارمنس سے نوازا۔ یہ ایوارڈ ملک کے نمایاں فنکاروں اور شخصیات کو ان کی نمایاں خدمات کے اعتراف میں دیا جاتا ہے۔