سیالکوٹ بیورو چیف مدثر رتو سے
ڈپٹی کمشنر صبا اصغر علی کی زیر قیادت انسدادِ کوڑا کرکٹ مہم کے سلسلے میں آگاہی واک کا انعقاد کیا گیا۔ واک میں ضلعی انتظامیہ، صفائی عملے، متعلقہ محکموں کے افسران اور شہریوں کی بڑی تعداد نے شرکت کی۔
اس موقع پر ڈپٹی کمشنر صبا اصغر علی نے کہا کہ وزیر اعلیٰ پنجاب مریم نواز شریف کے وژن اور ستھرا پنجاب مہم کے تحت گلیوں، محلوں، بازاروں اور دیگر عوامی مقامات پر کوڑا کرکٹ پھینکنے والوں کے خلاف سخت قانونی کارروائی عمل میں لائی جائے گی۔ انہوں نے واضح کیا کہ صفائی قوانین کی خلاف ورزی کی صورت میں ایک ہزار روپے سے لے کر سات لاکھ روپے تک جرمانہ عائد کیا جا سکتا ہے۔
ڈپٹی کمشنر نے کہا کہ صاف ستھرا ماحول صحت مند معاشرے کی بنیاد ہے اور اپنے شہر و گاؤں کو صاف رکھنا ہم سب کی مشترکہ ذمہ داری ہے۔ انہوں نے شہریوں پر زور دیا کہ ستھرا پنجاب کی ٹیموں کے ساتھ مکمل تعاون کریں اور صفائی کے نظام کو بہتر بنانے میں انتظامیہ کا ساتھ دیں۔
انہوں نے مزید کہا کہ شہری صفائی ستھرائی سے متعلق اپنی شکایات ہیلپ لائن 1139 پر درج کروائیں، جن کا بروقت ازالہ یقینی بنایا جائے گا۔
آگاہی واک میں ایم ڈی سیالکوٹ ویسٹ مینجمنٹ کمپنی سلمان احمد ، اسسٹنٹ ڈائریکٹر لیگل رانا لطیف اور میڈیا مینیجر فہد جاوید کے علاوہ متعلقہ افسران اور ملازمین بھی موجود تھے۔ شرکاء نے صفائی، نظم و ضبط اور ذمہ دار شہری ہونے کے عزم کا اظہار کیا۔