سیالکوٹ(بیوروچیف مدثررتو کی رپورٹ) شدید دھند کے باعث مسافر بس ٹریکٹر ٹرالر سے ٹکرا گئی، دو افراد جاں بحق، ایک زخمی
سیالکوٹ کے علاقے ڈسکہ روڈ نزد سدرہ بدرہ سٹاپ شدید دھند کے باعث ایک المناک ٹریفک حادثہ پیش آیا، جہاں ایک مسافر بس سامنے سے جانے والے ٹریکٹر ٹرالر سے ٹکرا گئی۔ حادثے کے نتیجے میں دو افراد موقع پر ہی جاں بحق جبکہ ایک شخص شدید زخمی ہو گیا۔
اطلاعات کے مطابق حادثہ صبح کے وقت شدید دھند کے باعث پیش آیا، جس کی وجہ سے حدِ نگاہ انتہائی کم ہو چکی تھی۔ مسافر بس ڈسکہ روڈ پر رواں دواں تھی کہ اچانک سامنے موجود ٹریکٹر ٹرالر نظر نہ آنے کے باعث بس اس سے ٹکرا گئی۔ تصادم اتنا شدید تھا کہ بس کا اگلا حصہ بری طرح متاثر ہوا۔
ریسکیو 1122 کو حادثے کی اطلاع ملتے ہی امدادی ٹیمیں فوری طور پر جائے وقوعہ پر پہنچ گئیں۔ ریسکیو اہلکاروں نے جاں بحق ہونے والے افراد کی لاشیں قریبی ہسپتال منتقل کر دیں، جبکہ زخمی شخص کو موقع پر ابتدائی طبی امداد فراہم کرنے کے بعد مزید علاج کے لیے ہسپتال منتقل کیا گیا۔
ریسکیو حکام کے مطابق خوش قسمتی سے بس میں سوار دیگر تمام مسافر محفوظ رہے، تاہم حادثے کے باعث کچھ دیر کے لیے ٹریفک کی روانی متاثر رہی۔ پولیس نے موقع پر پہنچ کر ٹریفک کو بحال کروایا اور واقعے کی مزید تحقیقات کا آغاز کر دیا ہے۔
شہریوں نے متعلقہ اداروں سے مطالبہ کیا ہے کہ شدید دھند کے دوران ٹریفک کنٹرول اور حفاظتی اقدامات کو مزید مؤثر بنایا جائے تاکہ قیمتی انسانی جانوں کے ضیاع کو روکا جا سکے۔