سندھ حکومت کی کفایت شعاری پالیسی نافذ، دکانوں اور مارکیٹس کے اوقات محدود

کراچی: سندھ حکومت نے کفایت شعاری پالیسی کے تحت صوبے بھر میں کاروباری اوقات کار محدود کرنے کا فیصلہ کرتے ہوئے دکانوں، شاپنگ مالز، ہوٹلز اور شادی ہالز کے نئے اوقات کا اعلان کر دیا ہے۔

حکومت سندھ کی جانب سے جاری کردہ نوٹیفکیشن کے مطابق کراچی سمیت تمام ڈویژنل ہیڈکوارٹرز میں دکانیں، مارکیٹس اور شاپنگ مالز رات 9 بجے بند ہوں گے، جبکہ دیگر اضلاع میں یہ اوقات رات 8 بجے تک محدود کر دیے گئے ہیں۔نوٹیفکیشن میں بتایا گیا ہے کہ ہوٹلز اور فوڈ آؤٹ لیٹس کو شام 7 بجے سے رات 11 بج کر 30 منٹ تک کھلا رکھنے کی اجازت ہوگی، تاہم ہوم ڈیلیوری اور ٹیک اوے سروس پر کسی قسم کی پابندی عائد نہیں ہوگی۔اسی طرح شادی ہالز اور بینکوئٹس کو رات 8 بجے سے 12 بجے تک تقریبات منعقد کرنے کی اجازت دی گئی ہے۔حکومت نے واضح کیا ہے کہ تندور، دودھ کی دکانیں، بیکریز، میڈیکل اسٹورز، لیبارٹریز، کلینکس، اسپتال اور پیٹرول پمپس ان پابندیوں سے مستثنیٰ ہوں گے۔نوٹیفکیشن کے مطابق کفایت شعاری پالیسی پر فوری طور پر عمل درآمد شروع کر دیا گیا ہے، اور متعلقہ اداروں کو ہدایات جاری کر دی گئی ہیں کہ نئے اوقات کار پر سختی سے عمل یقینی بنایا جائے۔