گورنر سندھ کامران ٹیسوری نے گل پلازہ سانحے میں شہید ہونے والے فائر فائٹر فرقان علی کی رہائش گاہ کا دورہ کیا اور اہلِ خانہ سے ملاقات کے دوران انہیں خراجِ عقیدت پیش کیا۔
گورنر سندھ نے کہا کہ فرقان علی نے اپنی جان کی پرواہ کیے بغیر فرض کی ادائیگی کی اور قوم کے لیے قربانی دی۔ گل پلازہ سانحے میں قیمتی جانیں ضائع ہوئیں اور متعدد افراد کے کاروبار تباہ ہو گئے، جس پر پوری قوم افسردہ ہے۔
کامران ٹیسوری نے اعلان کیا کہ شہید فرقان علی کے نام سے ایک فائر اسٹیشن منسوب کیا جائے گا اور سرکاری رہائش بھی ان کے اہلِ خانہ کے نام منتقل کی جائے گی۔ انہوں نے کہا کہ وہ ذاتی طور پر فرقان علی کو سول ایوارڈ (ستارہ امتیاز) کے لیے نامزد کر رہے ہیں اور اس سلسلے میں صدر مملکت کو خط بھی بھیجا جائے گا۔
مزید براں، شہید کے اہلِ خانہ کو ایک پلاٹ فراہم کیا جائے گا جس پر بلڈرز کی مدد سے گھر تعمیر کر کے منتقل کیا جائے گا۔ فرقان علی کے نام سے ایک اسٹریٹ منسوب کرنے کے لیے میئر کراچی کو بھی خط لکھا جائے گا۔
گورنر سندھ نے گل پلازہ سانحے پر بات کرتے ہوئے کہا کہ سیاست یا الزام تراشی کے بجائے اس سانحے سے سبق سیکھنے اور مستقبل کے لیے مؤثر حکمتِ عملی بنانے کی ضرورت ہے۔ انہوں نے یاد دلایا کہ سو سے زائد لواحقین اب بھی اپنے پیاروں کے ڈی این اے نتائج کے منتظر ہیں اور کئی خاندانوں کو اپنے پیاروں کی لاشیں تک نہیں مل سکیں۔
کامران ٹیسوری نے کہا کہ شہر میں پہلے ہی بہت خونریزی ہو چکی ہے اور سیاسی جماعتوں کے درمیان الزام تراشی بند ہونی چاہیے۔ ممکن ہے کہ شہید کے پاس جدید حفاظتی آلات نہ ہوں، جن سے وہ اپنی جان بچا سکتے۔
شہید فائر فائٹر فرقان علی کو ستارہ امتیاز سے نوازنے کے لیے سفارش
