سری لنکا نے امریکی جنگی طیاروں کو اپنے اڈے پر تعینات کرنے کی درخواست مسترد کر دی ہے، جسے غیر جانبداری برقرار رکھنے کا فیصلہ قرار دیا گیا ہے۔
سری لنکن صدر انورا کمارا ڈسانائیکے نے پارلیمنٹ میں خطاب کرتے ہوئے بتایا کہ امریکا نے مارچ کے آغاز میں جنوبی مٹالا انٹرنیشنل ایئرپورٹ پر دو جنگی طیارے تعینات کرنے کی درخواست کی تھی، تاہم حکومت نے اسے مسترد کر دیا۔
صدر کے مطابق ان طیاروں پر اینٹی شپ میزائل نصب تھے اور انہیں جبوتی کے اڈے سے منتقل کرنے کا منصوبہ تھا، جو خطے کی صورتحال کے تناظر میں حساس معاملہ بن سکتا تھا۔
انہوں نے واضح کیا کہ سری لنکا اپنی سرزمین کو کسی بھی ایسے فوجی مقصد کے لیے استعمال نہیں ہونے دے گا جو کسی فریق کے لیے مددگار یا نقصان دہ ثابت ہو، اور ملک اپنی غیر جانبداری برقرار رکھے گا۔
صدر نے یہ بھی بتایا کہ اسی دوران ایران نے بھی اپنے جنگی جہازوں کے لیے پورٹ کال کی درخواست کی تھی، جس پر بھی غور کیا گیا۔
ماہرین کے مطابق یہ فیصلہ خطے میں بڑھتی کشیدگی کے دوران چھوٹے ممالک کی محتاط پالیسی کی عکاسی کرتا ہے، جبکہ کئی ممالک پہلے ہی ایران کے خلاف جنگ میں براہ راست شامل ہونے سے گریز کر رہے ہیں۔
سری لنکا کا امریکی جنگی طیاروں کو اڈہ دینے سے انکار
