سپریم کورٹ آف پاکستان نے توہینِ مذہب کے ایک ملزم کی میت کی تدفین کے دوران ہنگامہ آرائی کے مقدمے میں نامزد ملزم مولوی احمد کی درخواستِ ضمانت مسترد کر دی ہے۔ عدالتِ عظمیٰ نے یہ درخواست ملزم کی جانب سے واپس لینے کی بنیاد پر خارج کی۔
کیس کی سماعت کے دوران ملزم کے وکیل نے مؤقف اختیار کیا کہ واقعہ میت کی تدفین کے وقت پیش آنے والے تنازعے کا نتیجہ تھا، جس کے دوران فریقین کے درمیان جھگڑا ہوا۔ وکیل کے مطابق معاملہ وقتی اشتعال کا تھا اور ملزم کو بلاوجہ مقدمے میں نامزد کیا گیا۔سپریم کورٹ نے کیس کی نوعیت کو مدنظر رکھتے ہوئے ٹرائل کورٹ کو ہدایت کی کہ وہ مقدمے کی سماعت تین ماہ کے اندر مکمل کرے تاکہ انصاف کے تقاضے بروقت پورے کیے جا سکیں۔ عدالت نے اس بات پر زور دیا کہ ایسے حساس معاملات میں قانون کے مطابق اور غیر جانبدارانہ طریقے سے فیصلہ ہونا چاہیے۔
واضح رہے کہ توہینِ مذہب کے ملزم کی میت دفنانے کے معاملے پر علاقے میں شدید کشیدگی پیدا ہو گئی تھی، جس کے نتیجے میں ہنگامہ آرائی اور جھگڑے کی صورتحال سامنے آئی، بعد ازاں پولیس نے کارروائی کرتے ہوئے مولوی احمد سمیت دیگر افراد کے خلاف مقدمہ درج کیا تھا۔عدالت کے فیصلے کے بعد کیس اب ٹرائل کورٹ میں تیزی سے آگے بڑھایا جائے گا۔