وزیراعظم شہباز شریف نے قومی کرکٹ ٹیم کو ٹی 20 ورلڈ کپ 2026 میں بھارت کے خلاف میچ کھیلنے کی اجازت دے دی ہے۔ یہ فیصلہ پاکستان کے مؤقف کی قبولیت اور آئی سی سی کی جانب سے طے شدہ شرائط مانے جانے کے بعد کیا گیا۔
حکومتی ذرائع کے مطابق وزیراعظم نے دوست ممالک کی درخواستوں اور سفارتی مشاورت کو مدنظر رکھتے ہوئے منظوری دی۔ فیصلے کا مقصد کھیل کے جذبے کو برقرار رکھنا اور عالمی سطح پر کرکٹ کے تسلسل کو یقینی بنانا ہے۔حکام کا کہنا ہے کہ پاکستان نے اصولی مؤقف کے ساتھ اپنے تحفظات آئی سی سی کے سامنے رکھے، جس کے بعد معاملات طے پائے اور قومی ٹیم کی شرکت کی راہ ہموار ہوئی۔
پاکستان کے موقف کی جیت،حکومت نے پاکستان کرکٹ ٹیم کو بھارت کیساتھ میچ کھیلنے کی اجازت دے دی،پاکستان اور بھارت کے درمیان میچ شیڈول کے مطابق ہوگا،ٹی ٹوئنٹی ورلڈ کپ میں پاکستان اور بھارت کا مقابلہ 15 فروری کو شیڈول ہے،
قبل ازیں وزیرِاعظم پاکستان شہباز شریف کو پاکستان کرکٹ بورڈ (پی سی بی) کے چیئرمین محسن نقوی کی جانب سے باضابطہ طور پر اُن اعلیٰ سطحی مشاورتوں کے نتائج سے آگاہ کیا گیا ہے جو پی سی بی، انٹرنیشنل کرکٹ کونسل (آئی سی سی) اور بنگلہ دیش کرکٹ بورڈ (بی سی بی) کے نمائندوں کے درمیان منعقد ہوئیں۔حکومتِ پاکستان نے بنگلہ دیش کرکٹ بورڈ کی جانب سے پی سی بی کو ارسال کی گئی باضابطہ درخواستوں کا، نیز سری لنکا، متحدہ عرب امارات اور دیگر رکن ممالک کی جانب سے موصول ہونے والی تائیدی مراسلت کا بھی جائزہ لیا۔ ان خط و کتابت میں حالیہ درپیش چیلنجز کے قابلِ عمل حل کے لیے پاکستان کے قائدانہ کردار کی درخواست کی گئی تھی۔
حکومت نے بی سی بی کے صدر جناب امین الاسلام کے بیان کا بھی نوٹس لیا۔ برادر ملک کی جانب سے اظہارِ تشکر کو نہایت خلوص اور گرمجوشی سے قبول کیا جاتا ہے۔ پاکستان اس عزم کا اعادہ کرتا ہے کہ وہ بنگلہ دیش کے شانہ بشانہ کھڑا ہے۔آج شام وزیرِاعظم نے سری لنکا کے صدر عزت مآب انورا کمارا ڈسانائیکے سے ٹیلیفونک گفتگو کی۔ خوشگوار اور دوستانہ بات چیت کے دوران دونوں رہنماؤں نے اس امر کو یاد کیا کہ پاکستان اور سری لنکا ہمیشہ بالخصوص مشکل اوقات میں ایک دوسرے کے شانہ بشانہ کھڑے رہے ہیں۔ سری لنکن صدر نے وزیرِاعظم سے درخواست کی کہ موجودہ تعطل کے خوش اسلوبی سے حل کے لیے سنجیدگی سے غور کیا جائے۔کثیرالجہتی مشاورت کے نتیجے میں حاصل ہونے والی پیش رفت اور دوست ممالک کی درخواستوں کو مدِنظر رکھتے ہوئے، حکومتِ پاکستان پاکستان نیشنل کرکٹ ٹیم کو ہدایت کرتی ہے کہ وہ 15 فروری 2026 کو آئی سی سی مینز ٹی ٹوئنٹی ورلڈ کپ کے اپنے شیڈول میچ میں شرکت کے لیے میدان میں اترے۔مزید برآں، یہ فیصلہ کرکٹ کی روح کے تحفظ اور اس عالمی کھیل کے تسلسل کو تمام شریک ممالک میں برقرار رکھنے کے مقصد سے کیا گیا ہے۔