لاہور کے علاقے چوہنگ میں 16 سالہ طالبہ کے ساتھ زیادتی کے بعد ویڈیو کے ذریعے بلیک میلنگ کے افسوسناک واقعے پر وزیراعلیٰ پنجاب مریم نواز شریف کی ہدایات پر چیئرپرسن پنجاب ویمن پروٹیکشن اتھارٹی حنا پرویز بٹ نے متاثرہ طالبہ کے گھر کا دورہ کیا۔
حنا پرویز بٹ نے متاثرہ طالبہ اور اس کے اہلِ خانہ سے ملاقات کی، واقعے کی تفصیلات سنیں اور انہیں مکمل قانونی اور تحفظاتی معاونت کی یقین دہانی کروائی۔ انہوں نے کہا کہ متاثرہ بچی اور اس کے خاندان کو تنہا نہیں چھوڑا جائے گا اور پنجاب ویمن پروٹیکشن اتھارٹی انصاف کی فراہمی تک ان کے ساتھ کھڑی رہے گی۔
چیئرپرسن پنجاب ویمن پروٹیکشن اتھارٹی کو بریفنگ دیتے ہوئے پولیس حکام نے بتایا کہ متاثرہ بچی کو ویڈیو کے ذریعے خوفزدہ اور بلیک میل کرنے کے معاملے پر مقدمہ درج کر لیا گیا ہے جبکہ پولیس نے بروقت کارروائی کرتے ہوئے ملزم کو گرفتار بھی کر لیا ہے، مزید تفتیش جاری ہے۔اس موقع پر حنا پرویز بٹ نے کہا کہ بچیوں کو بلیک میل کرنا اور ہراساں کرنا ایک سنگین جرم ہے اور ایسے عناصر کسی رعایت کے مستحق نہیں۔ انہوں نے واضح کیا کہ جو بھی لڑکی بلیک میلنگ کا شکار ہو، وہ خوفزدہ نہ ہو، خاموش نہ رہے بلکہ فوراً آواز اٹھائے، کیونکہ حکومت اور قانون اس کے ساتھ کھڑے ہیں۔
حنا پرویز بٹ نے کہا کہ شکایت درج کروانے والی ہر بچی کو انصاف کی فراہمی یقینی بنائی جائے گی اور بلیک میلنگ اور ہراسانی میں ملوث عناصر کو قانون کے کٹہرے میں لا کر سخت سزا دلوائی جائے گی۔ انہوں نے مزید کہا کہ متاثرہ طالبہ کو قانونی اور نفسیاتی معاونت فراہم کی جائے گی تاکہ وہ اعتماد کے ساتھ اپنی زندگی اور تعلیم کو آگے بڑھا سکے۔آخر میں حنا پرویز بٹ نے کہا کہ خواتین اور بچیوں کے خلاف جرائم پر حکومت پنجاب زیرو ٹالرنس پالیسی پر عمل پیرا ہے اور خواتین کے لیے محفوظ پنجاب وزیراعلیٰ پنجاب مریم نواز شریف کا واضح وژن ہے، جس پر کسی صورت سمجھوتہ نہیں کیا جائے گا۔