فتنہ الخوارج کا اہم رکن ہنزلہ زخمی حالت میں فورسز کے سامنے ہتھیار ڈالنے پر مجبورہو گیا
ٹانک کے علاقے میں سیکیورٹی فورسز کی بروقت کارروائی اور دباؤ کے باعث فتنہ الخوارج کے رکن ہنزلہ نے زخمی حالت میں ہتھیار ڈال دیے۔ ہنزلہ آپریشن یلغار 11 کے دوران ہونے والی ایک جھڑپ میں زخمی ہوا تھا۔ذرائع کے مطابق ہنزلہ ولد محمد یعقوب، عمر 18 سال، ساکن ڈبک پوسٹ آفس، عمر اڈہ، تحصیل و ضلع ٹانک، فتنہ الخوارج کی عسکری تشکیل کا حصہ تھا اور حالیہ دنوں میں ریاست مخالف سرگرمیوں میں ملوث رہا۔ سیکیورٹی فورسز کی مؤثر کارروائی کے دوران شدید زخمی ہونے کے بعد وہ مزید مزاحمت نہ کر سکا اور سرنڈر کر دیا۔فورسز کی انتھک کوششوں اور علاقے میں امن قائم رکھنے کے لیے جاری آپریشنز کا یہ ایک اور اہم نتیجہ ہے، جس سے نہ صرف خوارج کے حوصلے پست ہوئے ہیں بلکہ مقامی آبادی میں بھی اعتماد بحال ہوا ہے۔