بھارتی سیاح دنیا بھر میں اپنے ہی ملک کے لئے باعث شرمندگی، سیاحتی سفارتکاری کے لئے بڑا دھچکا،تھائی لینڈ نے بھارتی شہریوں کے لیے ویزا فری انٹری کی سہولت ختم کرتے ہوئے نئی امیگریشن پالیسی نافذ کر دی ہے، جس کے تحت بھارت کو ویزا آن ارائیول کی فہرست میں شامل کر دیا گیا ہے۔ اس فیصلے کو بھارتی سیاحت اور سفارتی کوششوں کے لیے ایک اہم دھچکا قرار دیا جا رہا ہے۔
بھارتی میڈیا رپورٹس، خصوصاً اکنامک ٹائمز کے مطابق تھائی حکام نے ویزا پالیسی میں تبدیلی کا فیصلہ ویزا سہولت کے مبینہ غلط استعمال، غیر قانونی ملازمتوں میں اضافے اور غیر ملکی شہریوں سے متعلق بڑھتے ہوئے سیکیورٹی خدشات کے پیش نظر کیا ہے۔نئی پالیسی کے بعد بھارتی شہریوں کو تھائی لینڈ میں داخلے کے لیے پہلے کی نسبت زیادہ امیگریشن شرائط کا سامنا کرنا پڑے گا، جبکہ ویزا فری سفر کی سہولت ختم ہونے سے سیاحتی سرگرمیوں پر بھی اثرات مرتب ہونے کا امکان ظاہر کیا جا رہا ہے۔
مبصرین کے مطابق حالیہ برسوں میں بعض ممالک میں بھارتی سیاحوں کے رویوں اور امیگریشن قوانین کی خلاف ورزیوں سے متعلق رپورٹس سامنے آنے کے بعد مختلف حکومتیں اپنی ویزا پالیسیوں کا ازسرِ نو جائزہ لے رہی ہیں۔ تھائی لینڈ کا یہ اقدام بھی اسی سلسلے کی ایک کڑی قرار دیا جا رہا ہے۔تجزیہ کاروں کا کہنا ہے کہ ویزا قوانین میں یہ تبدیلی نہ صرف بھارتی سیاحوں کے لیے مشکلات کا باعث بن سکتی ہے بلکہ اسے بھارت کی سیاحتی سفارتکاری اور بین الاقوامی تشخص کے حوالے سے بھی ایک اہم پیش رفت کے طور پر دیکھا جا رہا ہے۔