آبنائے ہرمز سے چینی بحری جہازبھی گزر گئے، چین کی تصدیق

چین کی وزارتِ خارجہ نے تصدیق کی ہے کہ حالیہ دنوں میں تین چینی بحری جہاز اہم عالمی گزرگاہ آبنائے ہرمز سے بحفاظت گزر گئے ہیں۔

چینی وزارتِ خارجہ کی ترجمان ماؤ نِنگ نے منگل کو پریس کانفرنس میں بتایا کہ یہ پیش رفت متعلقہ فریقین، بالخصوص ایران کے ساتھ رابطے اور ہم آہنگی کے بعد ممکن ہوئی۔انہوں نے کہا کہ "متعلقہ فریقین کے ساتھ تعاون کے بعد تین چینی جہازوں نے حال ہی میں آبنائے ہرمز عبور کی۔ ہم اس سلسلے میں فراہم کی گئی معاونت کو سراہتے ہیں۔” ترجمان کا مزید کہنا تھا کہ آبنائے ہرمز اور اس کے گرد و نواح کے سمندری راستے عالمی تجارت اور توانائی کی ترسیل کے لیے انتہائی اہم ہیں، اور چین خطے میں فوری جنگ بندی اور امن و استحکام کی بحالی کا مطالبہ کرتا ہے۔

پس منظر کے طور پر، ایرانی حکام پہلے ہی واضح کر چکے ہیں کہ غیر دشمن ممالک کے جہاز ایران کے ساتھ پیشگی رابطے کے بعد آبنائے ہرمز سے گزر سکتے ہیں۔ حالیہ دنوں میں ایران، چین، بھارت اور پاکستان سے وابستہ متعدد جہاز اس اہم راستے سے گزر چکے ہیں۔دوسری جانب ایرانی حکام نے عندیہ دیا ہے کہ بعض آئل ٹینکرز کو محفوظ گزرگاہ فراہم کرنے کے بدلے فیس بھی عائد کی جا سکتی ہے۔ یہ بیان اس رپورٹ کے بعد سامنے آیا جس میں دعویٰ کیا گیا تھا کہ کم از کم دو جہازوں نے آبنائے ہرمز سے گزرنے کے لیے بھاری رقوم ادا کیں۔

ماہرین کے مطابق، خلیجی خطے میں جاری کشیدگی کے باعث عالمی توانائی سپلائی اور بحری تجارت متاثر ہونے کا خدشہ بڑھ گیا ہے، جبکہ سفارتی سطح پر کوششیں جاری ہیں کہ اس اہم سمندری گزرگاہ کو کھلا اور محفوظ رکھا جائے۔