ڈونلڈ ٹرمپ کا ‘ہوسپٹل شپ’ گرین لینڈ بھیجنے کا اعلان

ڈونلڈ ٹرمپ نے بیمار افراد کی دیکھ بھال کے لیے‘ہوسپٹل شپ’ گرین لینڈ بھیجنے کا اعلان کیا ہے-

عالمی میڈیا کے مطابق امریکی صدر ڈونلڈ ٹرمپ نے ہفتے کے روز کہا ہے کہ وہ لیویزینا کے گورنر جیف لینڈری کے ساتھ مل کر گرین لینڈ کو ایک خصوصی جہاز بھیج رہے ہیں جو بطور اسپتال استعمال ہوگایہ جہاز گرین لینڈ میں بیمار افراد کی دیکھ بھال کے لیے روانہ کیا گیا ہے ، یہ جہاز راستے میں ہے۔

واضح رہے کہ امریکی نیوی کے پاس دو ایسے جہاز ہیں جو بطور اسپتال استعمال ہوتے ہیں لیکن یہ دونوں لیویزینا میں نہیں ہیں اور ابھی یہ واضح نہیں کہ کون سا جہاز روانہ ہوگا جبکہ وائٹ ہاؤس یا گورنر لینڈری کے دفتر نے ابھی تک اس بات کی وضاحت نہیں کی کہ آیا ڈنمارک یا گرین لینڈ نے یہ جہاز طلب کیا ہے یا یہ کس مخصوص طبی ضرورت کے لیے بھیجا جا رہا ہے امریکی وزارت دفاع نے بھی فوری طور پر کوئی تبصرہ نہیں کیا۔

امریکی میڈیا کے مطابق ٹرمپ کا یہ اعلان اُس وقت سامنے آیا جب ڈنمارک کے شاہ فریڈرک نے حال ہی میں گرین لینڈ کا دوسرا دورہ کیا، جس کا مقصد گرین لینڈ کے ساتھ اتحاد کا پیغام دینا تھا، جبکہ ٹرمپ نے ماضی میں گرین لینڈ خریدنے کی خواہش ظاہر کی تھی۔