ابوظہبی: متحدہ عرب امارات نے پاکستانی شہریوں پر عائد ویزہ پابندیاں باضابطہ طور پر ختم کرتے ہوئے ویزہ پراسیسنگ اور منظوری کا معمول بحال کر دیا ہے۔
تازہ ترین اطلاعات کے مطابق، اب پاکستانی شہریوں کے لیے وزٹ، ورک اور فیملی ویزوں کی درخواستیں متحدہ عرب امارات کے مجاز سرکاری چینلز کے ذریعے جمع کروائی جا سکتی ہیں۔یہ فیصلہ پاکستان اور یو اے ای کے درمیان سفری، سیاحتی اور روزگار کے مواقع میں اضافہ کرے گا، جبکہ دونوں ممالک کے درمیان دوطرفہ تعلقات اور علاقائی تعاون کو مزید مضبوط بنانے میں اہم کردار ادا کرے گا۔
اس پیش رفت کو پاکستان کے لیے ایک بڑی کامیابی قرار دیا جا رہا ہے، جو وزارتِ خارجہ اور وزارتِ انفارمیشن ٹیکنالوجی و ٹیلی کمیونیکیشن کی مؤثر کاوشوں کا نتیجہ ہے۔
واضح رہے کہ یو اے ای ہر سال لاکھوں پاکستانیوں کو مختلف اقسام کے ویزے جاری کرتا ہے، اور دبئی، ابوظہبی اور شارجہ پاکستانی ورکرز اور کاروباری برادری کے لیے بڑی توجہ کے مراکز ہیں۔ نئی ویزہ پالیسی کے اعلان کے بعد ٹریول ایجنٹس اور ویزہ کنسلٹنٹس نے بھی اسے ایک بڑی معاشی پیش رفت قرار دیا ہے۔ ذرائع کے مطابق، ویزہ درخواستیں اب فوری طور پر آن لائن جمع کروائی جا سکتی ہیں اور پہلے سے منظور شدہ پاکستانی درخواست دہندگان کے معاملات پر بھی کارروائی تیز کر دی گئی ہے۔