اوچ شریف: کرنٹ لگنے کا افسوسناک واقعہ، زیرِ تعمیر مکان میں کام کرنے والا نوجوان مزدور جاں بحق

اوچ شریف (باغی ٹی وی،نامہ نگارحبیب خان)اوچ شریف کے علاقہ شمس کالونی، مسجد طیبہ سے ملحق مولانا سراج احمد سعیدی کے زیرِ تعمیر مکان میں کام کے دوران پیش آنے والے افسوسناک حادثے میں 20 سالہ نوجوان مزدور کرنٹ لگنے سے جان کی بازی ہار گیا۔
تفصیلات کے مطابق جاں بحق ہونے والے نوجوان کی شناخت مومن عباس ولد غلام عباس کے نام سے ہوئی ہے، جو روزانہ اجرت پر تعمیراتی مزدوری کرتا تھا۔ عینی شاہدین کے مطابق حادثہ اس وقت پیش آیا جب مکان پر تعمیراتی کام جاری تھا اور مومن عباس نیچے پانی کی موٹر چلانے گیا۔ اس دوران اچانک موٹر میں برقی رو دوڑ گئی جس کے باعث وہ شدید کرنٹ کی زد میں آ کر موقع پر ہی بے ہوش ہو کر گر پڑا۔
واقعے کی اطلاع ملتے ہی قریبی افراد اور اہلِ محلہ موقع پر جمع ہو گئے۔ ریسکیو اور متعلقہ افراد نے متاثرہ نوجوان کی حالت چیک کی، جبکہ ابتدائی طبی امداد کے طور پر سی پی آر (CPR) بھی کی گئی، تاہم وہ جانبر نہ ہو سکا۔ بعد ازاں اسے فوری طور پر رورل ہیلتھ سینٹر (RHC) اوچ شریف منتقل کیا گیا، جہاں ڈاکٹروں نے معائنے کے بعد اس کی موت کی تصدیق کر دی۔
حادثے کی خبر پھیلتے ہی اوچ شریف میں سوگ کی فضا چھا گئی۔ اہلِ خانہ پر غم کا پہاڑ ٹوٹ پڑا جبکہ اہلِ علاقہ کی بڑی تعداد جائے وقوعہ اور اسپتال پہنچ گئی۔