اقوام متحدہ سیکرٹری جنرل کی پاکستان میں مسافر ٹرین پر دہشتگرد حملے کی مذمت

پاکستان کے شہر کوئٹہ سے پشاور جانے والی جعفر ایکسپریس پر دہشتگردوں کے حملے کے بعد اقوام متحدہ کے سیکرٹری جنرل نے شدید مذمت کی ہے اور یرغمالیوں کی فوری رہائی کا مطالبہ کیا ہے۔ اقوام متحدہ کے سیکرٹری جنرل کے ترجمان اسٹیفن ڈوجارک نے اس حملے کی تفصیلات بیان کرتے ہوئے کہا کہ وہ اس صورتحال پر گہری نظر رکھے ہوئے ہیں اور دہشتگردوں کی طرف سے مسافروں کو یرغمال بنائے جانے کے تمام واقعات کی سختی سے مذمت کرتے ہیں۔

اسٹیفن ڈوجارک نے مزید کہا کہ اقوام متحدہ یرغمالیوں کی فوری رہائی کی حمایت کرتا ہے اور اس بات پر زور دیتا ہے کہ ان کی حفاظت کو ہر ممکن طریقے سے یقینی بنایا جائے۔

پاکستانی فورسز نے دہشتگردوں کے حملے کے بعد فوراً کارروائی شروع کر دی تھی، اور اب تک 155 یرغمالی مسافروں کو بازیاب کر لیا گیا ہے۔ اس آپریشن میں 27 دہشتگرد بھی مارے گئے ہیں۔ فورسز کی کارروائی جاری ہے اور امید کی جا رہی ہے کہ باقی مسافروں کو بھی جلد آزاد کر لیا جائے گا۔اس دہشتگرد حملے کے بعد اقوام متحدہ کی طرف سے پاکستان کی حکومت کو مکمل حمایت کا یقین دلایا گیا ہے اور عالمی سطح پر دہشتگردی کے خلاف یکجہتی کا پیغام دیا گیا ہے۔