ایران اور امریکا کے درمیان جاری جنگ کے اثرات پاکستان کے گیس نظام پر بھی ظاہر ہونا شروع ہو گئے ہیں اور سوئی ناردرن کے سسٹم میں دباؤ بڑھنے کے باعث پنجاب میں غیر اعلانیہ گیس لوڈ مینجمنٹ شروع کر دی گئی ہے۔
ذرائع کے مطابق لاہور سمیت پنجاب کے مختلف شہروں میں گیس کا پریشر کم ہونے کے باعث صارفین کو گیس کی عدم دستیابی کا سامنا ہے اور کئی گھروں میں چولہے بند ہونے کی شکایات سامنے آ رہی ہیں۔
سوئی ناردرن حکام کا کہنا ہے کہ فی الحال باقاعدہ لوڈشیڈنگ کا شیڈول جاری نہیں کیا گیا تاہم سحری اور افطاری کے اوقات کو ترجیح دی جا رہی ہے جبکہ دیگر اوقات میں گیس کا پریشر کم رکھا جا رہا ہے۔
حکام کے مطابق پریشر میں کمی کے باعث خاص طور پر گنجان آبادی والے علاقوں میں گیس کی فراہمی متاثر ہو سکتی ہے۔
ذرائع نے مزید بتایا کہ آر ایل این جی کی سپلائی 800 ملین کیوبک فٹ سے کم ہو کر تقریباً 200 ملین کیوبک فٹ رہ گئی ہے۔ حکام کا کہنا ہے کہ عید کے بعد صورتحال کا جائزہ لے کر آئندہ فیصلے کیے جائیں گے۔
ایران امریکا جنگ کے اثرات، پنجاب میں گیس کی غیر اعلانیہ لوڈ مینجمنٹ شروع
