میرپور ماتھیلو باغی ٹی وی نانگار مشتاق علی لغاری
ضلع گھوٹکی کی تاریخ میں پہلی بار ڈی ایچ کیو اسپتال میرپور ماتھیلو میں یورولوجی (امراضِ گردہ و مثانہ) کا شعبہ باقاعدہ طور پر فعال کر دیا گیا ہے، جہاں جدید مشین یو آر ایس کے ذریعے مریضوں کا علاج کیا جائے گا۔
خب ڈپٹی کمشنر گھوٹکی منظور احمد کنرانی کی خصوصی کاوشوں سے سندھ حکومت نے ڈی ایچ کیو اسپتال میرپور ماتھیلو کو جدید ترین یو آر ایس مشین فراہم کی ہے، جس کا باقاعدہ افتتاح ڈپٹی کمشنر گھوٹکی نے کیا۔اس موقع پر ڈپٹی کمشنر گھوٹکی نے خطاب کرتے ہوئے کہا کہ ضلع گھوٹکی کے شعبہ صحت میں بہتری کے لیے مسلسل کوششیں جاری ہیں، سندھ حکومت اسپتالوں کو جدید سہولیات فراہم کر رہی ہے تاکہ عوام کو بہتر طبی سہولتیں میسر آ سکیں۔ ڈی ایچ کیو اسپتال میں یورولوجی شعبہ فعال ہونے سے ضلع کے ہزاروں افراد کو فائدہ پہنچے گا جو پہلے علاج کے لیے دوسرے اضلاع کا رخ کرنے پر مجبور تھے۔
میڈیکل سپرنٹنڈنٹ ڈاکٹر سرفراز علی شاہ نے بتایا کہ ڈی ایچ کیو اسپتال میں پہلی بار یورولوجی کا شعبہ قائم کیا گیا ہے، جس کے تحت روزانہ کی بنیاد پر گردوں اور مثانے میں پتھری کے مریضوں کی جانچ کی جائے گی، جبکہ ابتدائی طور پر ہر ہفتے بدھ کے روز 3 سے 4 آپریشن کیے جائیں گے، بعد ازاں مرحلہ وار ان کی تعداد میں اضافہ کیا جائے گا۔ملک کے نامور معالج ڈاکٹر ادیب رضوی کی سربراہی میں تربیت حاصل کرنے والے کنسلٹنٹ یورولوجسٹ اینڈ اینڈواسکوپی سرجن ڈاکٹر سید سرور نے بتایا کہ ضلع گھوٹکی میں پتھری کے مریضوں کی شرح بہت زیادہ ہے، جدید یو آر ایس مشین کے ذریعے بغیر کسی بڑے آپریشن کے لیزر کے ذریعے گردوں کی نالی میں موجود پتھری کو توڑ کر نکالا جائے گا۔اس موقع پر ڈی ایچ او ڈاکٹر راؤ آفتاب بھی موجود تھے۔