امریکا اور اسرائیل کے مشترکہ حملوں میں ایران کے انٹیلی جنس چیف میجر جنرل مجید خادمی شہید ہوگئے ہیں، ایرانی میڈیا نے اس کی تصدیق کردی۔
ایرانی خبر رساں اداروں کے مطابق مجید خادمی کو 2025ء میں ایران کا انٹیلی جنس چیف تعینات کیا گیا تھا۔ پاسداران انقلاب نے بھی تصدیق کرتے ہوئے کہا ہے کہ میجر جنرل مجید خادمی آج صبح امریکی و اسرائیلی حملے میں شہید ہوئے۔
ترجمان پاسداران انقلاب گارڈز کے مطابق ایرانی فضائی دفاعی نظام نے گزشتہ شام خارگ جزیرے کے قریب ایک امریکی لوکس ڈرون مار گرایا۔ ترجمان کا کہنا تھا کہ ڈرون کو زمین سے فضا میں مار کرنے والے میزائل کے ذریعے نشانہ بنایا گیا، جبکہ جاری جنگ کے دوران مار گرائے گئے ڈرونز کی مجموعی تعداد 163 ہو گئی ہے۔ایرانی خبر ایجنسی کے مطابق تہران پر ہونے والے حالیہ امریکی اور اسرائیلی حملوں میں 6 بچے بھی شہید ہوگئے، جس کے بعد ہلاکتوں کی تعداد میں مزید اضافہ ہونے کا خدشہ ظاہر کیا جا رہا ہے۔