امریکی وزیر دفاع پیٹ ہیگستھ کی پریس کانفرنس میں صدر ٹرمپ کی کھل کر تعریف، ایران سے متعلق بڑے دعوے سامنے آگئے۔
پریس کانفرنس کے دوران پیٹ ہیگستھ نے کہا کہ صدر ٹرمپ نے ایران کو بڑی شکست دے کر نئی تاریخ رقم کی اور وہ کامیابی حاصل کی جو پہلے کسی کو نہیں ملی۔ انہوں نے جنگ میں حصہ لینے والے امریکی فوجی اہلکاروں کو خراج تحسین بھی پیش کیا۔
امریکی وزیر دفاع کا کہنا تھا کہ ایران کو جنگ میں شدید نقصان پہنچا، اس کی فضائیہ اور نیوی کو تباہ کر دیا گیا جبکہ اس کی جوہری صلاحیت کو بھی بڑا دھچکا لگا ہے۔ انہوں نے دعویٰ کیا کہ ایران نے خود جنگ بندی کے لیے درخواست کی جس پر صدر ٹرمپ نے نرمی کا مظاہرہ کیا۔
پیٹ ہیگستھ نے یہ بھی کہا کہ ایران کی قیادت میں تبدیلی کے آثار ہیں اور اب ایسے افراد سامنے آ رہے ہیں جو مذاکرات کے حامی ہیں۔ جوہری پروگرام سے متعلق سوال پر انہوں نے واضح کیا کہ امریکا کا مؤقف ہمیشہ یہی رہا ہے کہ ایران کے پاس ایٹمی ہتھیار نہیں ہونے چاہئیں۔
انہوں نے جنگ بندی کو ایک مثبت موقع قرار دیتے ہوئے کہا کہ یہی راستہ حقیقی امن اور مستقل معاہدے کی طرف لے جا سکتا ہے۔ ان کے مطابق وزارت دفاع اپنا کردار ادا کر چکی ہے تاہم امریکا اس بات کو یقینی بنانے کے لیے تیار ہے کہ ایران کسی بھی معاہدے کی شرائط پر مکمل عمل کرے۔
امریکی وزیر دفاع کی ٹرمپ کی تعریف، ایران پر بڑی کامیابی کا دعویٰ
