امریکا نے ایران پر اقتصادی دباؤ مزید بڑھاتے ہوئے ایرانی مالیاتی نیٹ ورکس پر نئی پابندیاں عائد کر دی ہیں، جبکہ دونوں ممالک کے درمیان ممکنہ مذاکرات کے نئے دور سے متعلق متضاد اطلاعات سامنے آ رہی ہیں۔
میڈیا رپورٹس کے مطابق امریکی محکمہ خزانہ نے ایرانی مالیاتی نیٹ ورکس کو نشانہ بناتے ہوئے نئی پابندیوں کا اعلان کیا ہے۔ ان پابندیوں کا مقصد ایران کے مالیاتی نظام تک رسائی محدود کرنا اور ان نیٹ ورکس کے ذریعے ہونے والی مالی سرگرمیوں پر مزید قدغن لگانا بتایا جا رہا ہے۔
دوسری جانب ایک امریکی نیوز ویب سائٹ نے دعویٰ کیا ہے کہ امریکا اور ایران کے درمیان مذاکرات کا نیا دور آئندہ ہفتے متوقع ہے، رپورٹ میں کہا گیا ہے کہ دونوں ممالک کے درمیان سفارتی رابطوں کو آگے بڑھانے کے لیے پس پردہ کوششیں جاری ہیں۔تاہم ایران نے ان اطلاعات پر محتاط ردعمل دیتے ہوئے واضح کیا ہے کہ اس نے امریکا سے مذاکرات کے نئے مرحلے کی کوئی درخواست نہیں کی۔ ایرانی وزارت خارجہ کے ترجمان نے کہا کہ ایران نے صرف ثالثی کرنے والے فریقوں کے دورۂ ایران کو قبول کیا ہے، جس کا یہ مطلب نہیں کہ براہ راست مذاکرات کی درخواست کی گئی ہے۔
تجزیہ کاروں کے مطابق امریکی پابندیوں کے تازہ فیصلے اور مذاکرات سے متعلق سامنے آنے والے متضاد بیانات اس بات کی نشاندہی کرتے ہیں کہ دونوں ممالک کے تعلقات اب بھی کشیدہ ہیں، تاہم سفارتی ذرائع کے ذریعے رابطے برقرار رکھنے کی کوششیں جاری ہیں۔