مشرق وسطیٰ بحران،وفاق اور صوبوں کے درمیان سبسڈی کے طریقہ کار پر مشاورت

مشرق وسطیٰ بحران سے پیدا مہنگائی سے کمزور طبقے کو بچانے کا مشن، وفاق اور صوبوں کے درمیان مختلف تجاویز پر تاحال اتفاق رائے نہ ہوسکا، وزیراعظم شہباز شریف حتمی فیصلے کیلئے مزید مشاورت کریں گے۔

وزیر خزانہ محمد اورنگزیب کی زیر صدارت اجلاس کو بتایا گیا کہ وفاق تقریباً 130 ارب روپے خرچ کر چکا، مزید 20 سے 25 ارب روپے کی گنجائش ہے، وفاقی حکومت نے بائیک چلانے والوں کو سبسڈی کا معاملہ صوبوں پر چھوڑ دیا،ذرائع کے مطابق موٹر سائیکل، رکشہ والوں کو 2 سے 3 لیٹر تک مفت پیٹرول فراہم کرنے کی تجویز ہے، متبادل آپشن کے طور پر اس کے مساوی سبسڈی کی رقم منتقل کرنے کی بھی تجویز ہے،ذرائع کا کہنا ہے کہ وفاقی حکومت نے بائیک چلانے والوں کو سبسڈی کا معاملہ صوبوں پر چھوڑ دیا، ڈیزل والی ٹرانسپورٹ اور ٹرک مالکان کو سبسڈی پر فیصلہ نہ ہوسکا، چھوٹے کسانوں کو فی ایکڑ کے حساب سے 1500 روپے تک سبسڈی کی تجویز ہے، مجوزہ سبسڈی صرف 5 ایکڑ اراضی والے کسانوں کیلئے ہوگی، وفاق اور صوبوں کے درمیان سبسڈی کے طریقہ کار پر مزید مشاورت ہوگی۔

ذرائع کے مطابق صوبہ سندھ اور پنجاب کمزور طبقے کو براہ راست خود سبسڈی دینے کو تیار ہیں، سبسڈی کی فراہمی پر قومی لائحہ عمل اور طریقۂ کار طے کرنے پر مزید مشاورت ہوگی۔