دریائے ستلج میں تاحال سیلاب کا خدشہ نہیں ،محکمہ آبپاشی

ترجمان محکمہ آبپاشی نے دریائے ستلج میں سیلاب کے خطرات بارے خبر کی تردید کرتے ہوئے کہا الہ آباد، علاقہ چھبر کے مقام پر دریائے ستلج معمول کے مطابق بہہ رہا ہے ۔

ترجمان محکمہ آبپاشی کے مطابق اس وقت دریائے ستلج میں پانی کا بہاؤ تقریباً 2,000 کیوسک ہے جو معمول کے مطابق ہے دریائے ستلج میں 50,000 کیوسک تک بہاؤ بھی معمول کی صورتحال تصور کیا جاتا ہے،لسیلاب کے کسی خطرے کا تاثر درست نہیں، محکمہ آبپاشی کی فیلڈ ٹیمیں الرٹ ہیں۔ دریائے ستلج کے تمام حفاظتی بندوں پر مسلسل نگرانی کر رہی ہے ۔ محکمہ کی ٹیمیں کسی بھی صورتحال سے نمٹنے کے لیے تیار ہیں عوام غیر مصدقہ خبروں اور افواہوں پر یقین نہ کریں ۔درست معلومات کے لیے صرف محکمہ آبپاشی کے سرکاری ذرائع پر اعتماد کریں۔

پنجاب میں مون سون کے طوفانی اسپیل نے مختلف شہروں میں ہنگامی صورتِ حال پیدا کر دی ہے شدید بارشوں کے باعث شہری زندگی بری طرح متاثر ہوئی ہے، جب کہ دریاؤں میں پانی کی سطح بلند ہونے پر متعلقہ اداروں کو ہائی الرٹ کر دیا گیا ہے صوبے بھر میں گزشتہ ایک ہفتے کے دوران بارشوں سے متعلق مختلف حادثات میں 22 افراد جاں بحق اور 183 زخمی ہو چکے ہیں،لاہور سمیت پنجاب کے مختلف اضلاع میں موسلادھار بارش کا سلسلہ جاری ہے، جس کے باعث نشیبی علاقے زیر آب آ گئے، متعدد سڑکیں متاثر ہوئیں اور کئی مقامات پر ٹریفک کی روانی بھی شدید متاثر رہی۔