پنجاب کے مختلف شہروں میں پولیس اور سی سی ڈی کے ساتھ مقابلوں کے دوران 11 ڈاکو ہلاک ہو گئے، جسے قانون نافذ کرنے والے اداروں کی بڑی کارروائی قرار دیا جا رہا ہے۔
تفصیلات کے مطابق فیصل آباد کے نواحی علاقے رشیدہ آباد میں ڈائیوو روڈ پر ہونے والے مقابلے میں 4 ڈاکو موقع پر مارے گئے۔ اسی طرح چنیوٹ میں ایک گھر میں واردات کے بعد فرار ہونے والے 3 ڈاکوؤں کو پولیس نے مقابلے کے دوران ہلاک کر دیا، جن کی شناخت علی حمزہ، نوید عباس اور غلام رضا کے نام سے ہوئی ہے۔ پولیس کے مطابق یہ ملزمان متعدد سنگین وارداتوں میں مطلوب تھے۔
حکام کا کہنا ہے کہ ہلاک ہونے والے ڈاکوؤں سے اسلحہ اور لوٹی گئی رقم بھی برآمد کر لی گئی ہے، جبکہ مزید تحقیقات جاری ہیں۔
دوسری جانب گوجرانوالہ اور جڑانوالہ میں سی سی ڈی کے ساتھ مقابلوں میں مزید 4 ڈاکو مارے گئے، جس سے مجموعی ہلاکتوں کی تعداد 11 ہو گئی ہے۔
پولیس کا کہنا ہے کہ جرائم پیشہ عناصر کے خلاف کارروائیاں جاری رہیں گی اور شہریوں کے جان و مال کے تحفظ کو یقینی بنایا جائے گا۔
شہریوں نے پولیس کی ان کارروائیوں کو سراہتے ہوئے امن و امان کی صورتحال بہتر بنانے کے لیے ایسے اقدامات کو ضروری قرار دیا ہے۔
پنجاب میں پولیس مقابلے، 11 ڈاکو ہلاک
