لاہور کے علاقے مانگا منڈی میں کھوکھر چوک کے قریب نامعلوم ملزمان نے فائرنگ کر کے 30 سالہ خاتون کو قتل کر دیا۔
پولیس کے مطابق جاں بحق خاتون کی شناخت کرن بی بی کے نام سے ہوئی ہے۔ لاش کو جائے وقوعہ سے شواہد اکٹھے کرنے کے بعد پوسٹ مارٹم کے لیے مردہ خانے منتقل کر دیا گیا ہے۔پولیس کا کہنا ہے کہ مقتولہ کرن بی بی، شیر علی کی تیسری بیوی تھیں، جبکہ شیر علی نے مجموعی طور پر تین شادیاں کر رکھی تھیں۔دوسری جانب مقتولہ کے لواحقین نے الزام عائد کیا ہے کہ کرن بی بی کو ان کے شوہر کی دوسری بیوی نے قتل کروایا ہے۔ تاہم پولیس کا کہنا ہے کہ اس الزام کی بھی تفتیش کی جا رہی ہے اور تمام پہلوؤں کا باریک بینی سے جائزہ لیا جا رہا ہے۔
ڈی ایس پی شاہزیب خان کے مطابق واقعے کی مختلف زاویوں سے تحقیقات جاری ہیں اور تفتیش کے دوران مزید حقائق سامنے آئیں گے۔ انہوں نے کہا کہ پولیس جلد ملزمان کو گرفتار کر کے قانون کے کٹہرے میں لائے گی۔