ایڈیشنل چیف سیکریٹری ساؤتھ پنجاب سے تاوان مانگنے والاگرفتار

ملتان میں پولیس نے ایڈیشنل چیف سیکریٹری ساؤتھ پنجاب سے تاوان مانگنے والے نوجوان کو گرفتار کر لیا۔

پولیس کے مطابق، تین روز قبل ایڈیشنل چیف سیکریٹری کو ایک دھمکی آمیز خط موصول ہوا تھا جس میں 2 ارب روپے کا تاوان طلب کیا گیا تھا۔ خط میں یہ بھی کہا گیا تھا کہ اگر یہ رقم ادا نہیں کی گئی تو ایڈیشنل چیف سیکریٹری کو جان سے مار دیا جائے گا۔پولیس کی جانب سے مزید بتایا گیا ہے کہ تین دن کے بعد ملزم کا سراغ لگایا گیا اور اُسے ایم ڈی اے چوک کے قریب سے گرفتار کر لیا گیا۔ پولیس نے ملزم کے خلاف تفتیش کا عمل جاری رکھا ہوا ہے تاکہ اس کے ساتھیوں اور اس کے جرم کی حقیقت سامنے لائی جا سکے۔

پولیس حکام کا کہنا ہے کہ ملزم سے مزید پوچھ گچھ کی جا رہی ہے اور اس کے دیگر جرائم کے بارے میں بھی تفتیش کی جا رہی ہے تاکہ اس کے نیٹ ورک کو بے نقاب کیا جا سکے۔ اس کارروائی کے بعد ایڈیشنل چیف سیکریٹری اور دیگر حکام میں اطمینان کی لہر دوڑ گئی ہے کہ ملزم کو گرفتار کر لیا گیا ہے۔