گوجرخان (قمرشہزاد) اوورسیز پاکستانیز فاؤنڈیشن چیئرمین سید قمر رضا نے معروف تجزیہ نگار شہزاد قریشی کی خصوصی دعوت پر پوٹھوہار پریس کلب گوجرخان کا دورہ کیا۔
پریس کلب آمد پر جنرل سیکریٹری بار ایسوسی ایشن گوجرخان جاوید بھٹی، مرکزی انجمن تاجران کے صدر راجہ جواد، ایڈووکیٹ ثاقب علی بیگ، چئیرمین اشتیاق اور صحافیوں نے ان کا بھرپور اور پرتپاک استقبال کیا، انہیں گلدستے پیش کیے اور مالا پہنائیں اور ان کی آمد کو کلب کے لیے اعزاز قرار دیا۔ تقریب کا آغاز تلاوت قرآن پاک سے ہوا اور نعت رسول مقبول پڑھی گی، سینئر صحافی پروفیسر حمید اصغر نے شاندار الفاظ میں خراج تحسین پیش کیا جبکہ معروف تجزیہ نگار شہزاد قریشی نے سید قمر رضا کی اوورسیز پاکستانیوں کے لیے انجام دی جانے والی خدمات پر تفصیلی بریفنگ دی۔ انہوں نے کہا کہ سید قمر رضا نے سمندر پار پاکستانیوں کے مسائل کے حل اور ان کی فلاح و بہبود کے لیے جو عملی اقدامات اٹھائے ہیں، وہ ناقابلِ فراموش ہیں اور ان کی قیادت میں او پی ایف ایک فعال ادارے کے طور پر ابھرا ہے۔
پوٹھوہار پریس کلب کے صحافیوں نے سید قمر رضا کی خدمات کو زبردست الفاظ میں خراجِ تحسین پیش کرتے ہوئے کہا کہ تارکینِ وطن پاکستان کا قیمتی سرمایہ ہیں اور ان کی داد رسی کرنا درحقیقت وطنِ عزیز کی خدمت ہے۔ تقریب کے آخر میں چیئرمین او پی ایف سید قمر رضا نے شرکاء سے خطاب کرتے ہوئے کہا کہ "میرا مقصد سمندر پار پاکستانیوں کے اعتماد کو بحال کرنا اور ان کے مسائل کو ان کی دہلیز پر حل کرنا ہے۔” انہوں نے پوٹھوہار پریس کلب کی صحافتی خدمات کو سراہتے ہوئے شہزاد قریشی اور تمام صحافی برادری کا شکریہ ادا کیا اور اس عزم کا اعادہ کیا کہ وہ اوورسیز پاکستانیوں کے حقوق کے تحفظ کے لیے اپنی کوششیں جاری رکھیں گے۔