شکارپور (باغی ٹی وی،نامہ نگار مشتاق علی لغاری)شکارپور میں میونسپل انتظامیہ کی خطرناک اور ناقابلِ معافی غفلت ایک اور معصوم جان نگل گئی۔ بھٹائی کالونی کا رہائشی کمسن بچہ عادل لاشاری کھیلتے ہوئے کھلے گٹر میں گر گیا اور ڈوب کر موقع پر ہی جاں بحق ہو گیا۔ دلخراش واقعے کے بعد علاقے میں کہرام مچ گیا اور فضا سوگوار ہو گئی۔
عینی شاہدین کے مطابق حادثے کے فوراً بعد بچے کو نکالنے کی کوششیں کی گئیں، تاہم گٹر میں پانی کی زیادتی کے باعث عادل کی جان نہ بچائی جا سکی۔ جاں بحق بچے کی والدہ غم کی شدت سے بار بار بے ہوش ہوئیں جبکہ اہلِ خانہ پر غم کا پہاڑ ٹوٹ پڑا۔ واقعے کے بعد علاقہ مکین شدید غم و غصے میں مبتلا نظر آئے۔
شہریوں نے میونسپل انتظامیہ پر سنگین الزامات عائد کرتے ہوئے کہا کہ شکارپور شہر میں درجنوں گٹر بغیر ڈھکن کے کھلے پڑے ہیں جو کسی بھی وقت مزید معصوم جانیں لے سکتے ہیں، مگر متعلقہ حکام مسلسل خاموش تماشائی بنے ہوئے ہیں۔ عوام کا کہنا ہے کہ متعدد بار شکایات کے باوجود کوئی عملی اقدام نہیں کیا گیا۔
افسوسناک سانحے کے بعد عوامی غصہ مزید شدت اختیار کر گیا ہے۔ شہریوں، سماجی حلقوں اور متاثرہ خاندان نے مطالبہ کیا ہے کہ شہر بھر میں موجود تمام کھلے گٹروں کو فوری طور پر بند کیا جائے، غفلت کے مرتکب میونسپل افسران اور ذمہ دار اہلکاروں کے خلاف سخت قانونی کارروائی کرتے ہوئے مقدمات درج کیے جائیں، واقعے کی شفاف اور غیر جانبدارانہ انکوائری کر کے رپورٹ عوام کے سامنے لائی جائے اور متاثرہ خاندان کو فوری اور بھاری مالی معاوضہ دیا جائے۔
شہریوں نے دو ٹوک الفاظ میں خبردار کیا ہے کہ اگر فوری اقدامات نہ کیے گئے تو شکارپور بھر میں شدید احتجاج کیا جائے گا، جس کی تمام تر ذمہ داری میونسپل انتظامیہ اور ضلعی حکام پر عائد ہوگی۔ عوام کا کہنا ہے کہ یہ سانحہ شکارپور کی میونسپل کارکردگی پر ایک بڑا سوالیہ نشان ہے اور اگر اب بھی قاتل گٹروں کو بند نہ کیا گیا تو یہ شہر معصوم بچوں کے لیے مزید خطرناک بنتا چلا جائے گا۔