لنڈی کوتل (باغی ٹی وی رپورٹ) ڈی پی او خیبر کی خصوصی ہدایات پر لنڈی کوتل پولیس نے منشیات کے خلاف بڑی کارروائی کرتے ہوئے ایک مشکوک شخص کو گرفتار کر کے 986 نشہ آور ایکسٹسی گولیاں برآمد کر لی ہیں۔
تفصیلات کے مطابق ایس ایچ او لنڈی کوتل زاہد اللہ کی نگرانی میں اے ایس ایچ او حضرت حسین نے دلخاد روڈ پر ناکہ بندی کی۔ اس دوران ایک مشکوک شخص اویس ولد اعتبار جان، سکنہ لنڈی کوتل کو روکا گیا اور تلاشی لی گئی۔ پولیس کے مطابق تلاشی کے دوران اس کے قبضے سے 986 عدد ایکسٹسی گولیاں برآمد ہوئیں، جو منشیات فروشوں کی مارکیٹ میں فروخت کے لیے تیار تھیں۔
ملزم کو موقع پر گرفتار کر کے اس کے خلاف مقدمہ درج کر لیا گیا ہے اور مزید تفتیش جاری ہے تاکہ منشیات کے نیٹ ورک کو بھی بے نقاب کیا جا سکے۔
مقامی مشران اور فلاحی تنظیموں نے پولیس کی کارروائی کو سراہا اور مطالبہ کیا کہ منشیات فروشوں کے خلاف کاروائیاں مزید تیز اور مؤثر بنائی جائیں تاکہ علاقے میں منشیات کی فروخت اور نوجوان نسل کی تباہی کو روکا جا سکے۔
یہ کارروائی خیبر پولیس کی ضلع میں منشیات کے خاتمے کے سلسلے میں جاری کوششوں کا حصہ ہے، جس کا مقصد نہ صرف اسمگلنگ کے نیٹ ورک کو ناکام بنانا بلکہ عام شہریوں کی حفاظت اور امن و امان کو برقرار رکھنا بھی ہے۔