مالی سال کے پہلے سات ماہ کے دوران پاکستان کی برآمدات صرف 18 ارب ڈالر رہیں، جبکہ درآمدات 40 ارب ڈالر سے تجاوز کر گئیں، جس سے تجارتی خسارہ مزید بڑھ گیا۔ رپورٹ کے مطابق اس مدت میں پاکستانی صارفین نے 106 ارب روپے کی چائے پی، اور آئی ایم ایف کے قرض کی ایک قسط سے زیادہ رقم صرف اسمارٹ فون کی درآمد پر خرچ کی گئی۔
دستاویز کے مطابق 7 ماہ میں 2.5 ارب ڈالر مالیت کی گاڑیاں اور اسمارٹ موبائل فونز درآمد کیے گئے۔ اسمارٹ فونز کی امپورٹ 1.13 ارب ڈالر سے زیادہ رہی، جو مجموعی طور پر 33 فیصد اضافے کے بعد 321 ارب روپے تک پہنچ گئی۔
رپورٹ میں مزید بتایا گیا ہے کہ غذائی اشیاء کی درآمد میں 19 فیصد اضافہ ہوا اور مجموعی حجم 5.5 ارب ڈالر تک پہنچ گیا، جبکہ مشینری کی درآمد میں 13 فیصد اضافہ دیکھنے کو ملا اور حجم 6 ارب ڈالر سے تجاوز کر گیا۔ اسی دوران کاروں، بسوں اور دیگر ٹرانسپورٹ کی درآمد میں 94 فیصد اضافہ ہوا، جس سے ملکی تجارتی خسارہ مزید بڑھ گیا۔
ماہرین اقتصادیات کے مطابق یہ اعداد و شمار پاکستان کی درآمدی انحصار، کرنٹ اکاؤنٹ خسارہ اور غیر ضروری درآمدات کے بڑھتے رجحان کو واضح کرتے ہیں، اور ملکی معیشت پر دباؤ مزید بڑھانے کا باعث بن رہے ہیں۔
مالی سال کے 7 ماہ میں پاکستان کی درآمدات 40 ارب ڈالر سے تجاوز
