حالیہ پاک افغان کشیدگی کے تناظر میں چترال کے سرحدی علاقے ارندو میں عوام کی بڑی تعداد نے پاک فوج سے اظہارِ یکجہتی کے لیے ایک ریلی کا انعقاد کیا۔
مظاہرین نے سرحد پار سے پاکستان میں کی جانے والی فتنہ الخوارج کی دہشتگردی کی کارروائیوں کے خلاف سخت نعرے بازی کی۔عوام علاقہ نے واضح کیا کہ موجودہ صورتحال میں پوری قوم افواجِ پاکستان کے ساتھ کھڑی ہے اور کسی بھی جارحیت کا بھرپور جواب دیا جائے گا۔ریلی کے شرکاء نے پاک فوج کی پیشہ ورانہ صلاحیتوں اور سرحدوں کے تحفظ میں کردار کو سراہتے ہوئے مکمل حمایت کا اعلان کیا اور ہر مشکل وقت میں پاک فوج کے شانہ بشانہ کھڑے ہونے کے عزم کا اعادہ کیا۔ریلی کے دوران قومی پرچم لہرائے گئے اور ملک کی خودمختاری، استحکام اور امن کے لیے بھرپور یکجہتی کا مظاہرہ کیا گیا۔ریلی کے اختتام پر ملکی سلامتی، سرحدوں کے تحفظ اور دہشتگردی کے خاتمے کے لیے خصوصی دعا کی گئی۔